დიმიტრი ცინცაძის ფონდის "შვილობილები"
"ვიცი, ამ დროში ყველას უჭირს, მაგრამ გამწარებული, ტკივილით სავსე დედა გწერთ: გთხოვთ დაგვეხმაროთ! არანაირი საშუალება აღარ გვაქვს. გთხოვთ, ჩემო კეთილო ადამიანებო! 1 ლარიც კი მნიშვნელოვანია ჩვენთვის... ჩემს პატარა ბიჭს გაუსაძლისი ტკივილები აქვს, დამეხმარეთ! ყოველი ლარის ჩარიცხვა ჩვენი ლოცვით, უკან დაგიბრუნდებათ..."
"ეს ლამაზი, სიცოცხლით სავსე გოგონა მკერდის ავთვისებიანი სიმსივნით არის ავად და მკურნალობის რთულ პერიოდს გადის. ამას ფინანსური პრობლემებიც თან დაერთო. თქვენს დახმარებას ჩვენი ოჯახისთვის სასიცოცხლო მნიშვნელობა აქვს!"
"ჩემი დემეტრე სასწრაფოდ გადავიყვანეთ თბილისში. ახლა რეანიმაციაში წევს, უგონო მდგომარეობაში იყო. თითოეული გაზიარება, თითოეული ზარი, 1 ლარიც კი მნიშვნელოვანია მისი სიცოცხლის შესანარჩუნებლად. დღეს უკვე გამოვიდა მდგომარეობიდან და დედა დამიძახა! არ ვიცი, უფალი რა ძალას მაძლევს, რომ ამას ვუძლებ და ვწერ, მაგრამ ახლა ყველაზე მეტად მჭირდება თქვენი დახმარება!" - წლების განმავლობაში, ამ შინაარსის წერილები შედიოდა დიმიტრი ცინცაძის სახელობის ფონდში, რომლის დახმარებით, ათეულობით ბავშვი უეჭველ სიკვდილს გადაურჩა. მათი სიცოცხლის გადარჩენა კეთილი ადამიანების დამსახურებაა.
ჟურნალი "გზა" ფონდის წარმომადგენელს - ეკატერინე ნონიაშვილს ესაუბრა, რომელიც ამ საქმეში ფონდის დაარსების პირველი დღეებიდან ჩაერთო:
- დიმიტრი ცინცაძის ფონდი უკვე 10 წლისაა. ჩვენმა საზოგადოებამ კარგად იცის, რომ ეს ფონდი ჟურნალისტებმა ჩამოაყალიბეს და მისი დახმარებით არაერთი სიმსივნით დაავადებული გადაარჩინეს. მე მხოლოდ რამდენიმე მათგანზე გიამბობთ: ჩვენს ფონდს საქმიანობა სულ ახალი დაწყებული ჰქონდა, როცა ლედი მეგრელიშვილის დედამ მოგვმართა. ამ ოჯახს ორი შვილი უკვე გარდაცვლილი ჰყავდა და მესამე გოგონასაც იგივე დიაგნოზი დაუსვეს - ოსტეოსარკომა, ანუ ძვლის კიბო. გამწარებულმა დედამ გვთხოვა, იქნებ, ლედი უცხოეთში სამკურნალოდ გაუშვათო... მიზნად დავისახე, რომ ეს ისტორია აუცილებლად ლედის გამარჯვებით უნდა დასრულებულიყო, სხვაგვარად ჩემთვის ეს ფონდი დამარცხებასა და წაგებასთან იქნებოდა გაიგივებული. გოგონას მკურნალობაში სული და გული ჩავდეთ, საფრანგეთის კლინიკაში გავუშვით და მან კიბო დაამარცხა. სრულად განიკურნა, მაგრამ ამდენმა ქიმიამ, სხივებმა, სხვადასხვა ტიპის მკურნალობამ ფეხი, რომელზეც ოსტეოსარკომა ჰქონდა, იმდენად დაასუსტა, რომ გოგონას ფეხის აუტანელი ტკივილები დაეწყო. ჯერ გვეგონა, კიბო "დაბრუნდა", ძალიან ვინერვიულეთ და თურქეთში გავუშვით. საბედნიეროდ, ონკოლოგია გამოირიცხა, მაგრამ ძვალი კვდომას განიცდიდა და ფეხის ამპუტაცია გახდა საჭირო. ხომ წარმოგიდგენიათ, 22 წლის გოგოსთვის ეს რას ნიშნავს? ლედის ერთი ფეხი მოჰკვეთეს! იმდენად პოზიტიური ადამიანია, რომ აქეთ მამხნევებდა და მამშვიდებდა, მაგრამ ოპერაციის შემდეგ, პროთეზის შეძენა გახდა საჭირო. დღეს მსოფლიოში ბევრი ისეთი პროთეზია, რომელიც ნამდვილ კიდურებს არ ჩამოუვარდება. ერთ-ერთი საუკეთესოა ამერიკული, რომელიც 40 ათასი დოლარი ღირს. ბევრი ადამიანი შევაწუხეთ და აქაც გავიმარჯვეთ: უღრმესი მადლობა ჩვენს მორაგბეებს, რომლებმაც ლედისთვის 32 ათასი ლარი შეაგროვეს და ჩაგვირიცხეს. თანხა ფონდიდანაც დავუმატეთ და გოგონას, რომელსაც ჩვენი ფონდის "შვილობილი" დავარქვით, თითქმის ისეთი ფეხი ექნება, როგორიც ჰქონდა.
- ალბათ, რამდენი ოჯახისთვის არის ეს ფონდი იმედისა და სიხარულის წყარო!
- მართლა არაერთ ოჯახს ვეიმედებით, რადგან დახმარება ბევრ ბავშვს სჭირდება. იმდენად ვეიმედებით, რომ მარტო სამედიცინო დახმარებისთვის არ გვირეკავენ: ამას წინათ ერთ-ერთი ბავშვის დედამ მოგვწერა, ორი დღეა საჭმელი არ გვაქვს. მაღაზიაში იმდენი ნისია დამიგროვდა, რომ ვეღარ ვყიდულობო. ჩვენ უფლება არ გვაქვს, ფონდის ფული ფიზიკურ პირებს ჩავურიცხოთ, ამიტომ პოსტიც დავდე, მეგობრებსაც ვთხოვე და ამ ოჯახს დავეხმარეთ. სიმსივნით დაავადებულ ბავშვს იმდენი რამ სჭირდება, რომ ამას მდიდარი ოჯახებიც ვერ უძლებენ... ჩვენი ფონდი მარტო საქველმოქმედო ორგანიზაცია კი არ არის, რომელიც ონკოლოგიურ პაციენტებს სამედიცინო ხარჯებს უფინანსებს ან მედიკამენტებს ყიდულობს, მათი ოჯახებისთვის იმდენად შინაურები ვხდებით, რომ ყოველთვის გვირეკავენ, როცა გამოუვალი მდგომარეობა აქვთ. დღეს სოციალურ ქსელებითაც ბევრი ოჯახი ითხოვს დახმარებას, მაგრამ როცა ჩვენ პოსტს ვდებთ, იმ ბავშვის დიაგნოზი და სამედიცინო ისტორია ათასნაირად გვაქვს გადამოწმებული, ექიმთანაც - დარეკილი, ანუ პაციენტზე ზუსტი ინფორმაცია გვაქვს.
- შეიძლება სოციალურ ქსელში გამოქვეყნებული ფოტოები და პოსტები ყალბი იყოს?
- სამწუხაროდ, უნდა ვაღიარო, რომ ბევრი აფერისტობს. ერთმა "საქველმოქმედო" ფონდმა თავის გვერდზე ჩვენი გარდაცვლილი ბენეფიციარის ფოტოც კი დადო. რომ დავრეკე და ვუსაყვედურე, ბოდიშის მოხდა დაიწყეს... თუ ჩვენს გვერდზე ბავშვის ფოტოს ნახავთ, ე.ი. მას მართლა სჭირდება მკურნალობაც და დახმარებაც. სამწუხაროა, რომ ყველას ვერ ვეხმარებით, რადგან ადრე რაც გვერიცხებოდა, იმ თანხის მეოთხედიც არ გვიგროვდება.
- ამის მიზეზი რა არის?
- ახლავე აგიხსნით: ხომ გამოაცხადეს, რომ ყველა ონკოპაციენტის უცხოეთში მკურნალობას სახელმწიფო დააფინანსებდა. ამას მართლა აკეთებენ: იაშვილის კლინიკაში შესულ ონკოპაციენტებს სთავაზობენ, რომ მათ შეუძლიათ თურქეთში ან ისრაელში წავიდნენ და იმკურნალონ. მართლა ბევრი ბავშვი წავიდა და იმკურნალა, მაგრამ ისინი საქართველოში ხომ ბრუნდებიან? მათ კიდევ ბევრი რამ სჭირდებათ: სისტემატური კონტროლი, გამოკვლევები, მედიკამენტები, რომელსაც სახელმწიფო არ აფინანსებს. ამ ნაწილში ჩვენ ბევრი ბავშვის პრობლემა მოვაგვარეთ. მაგალითად: 8 წლის გიორგი შენგელია სამტრედიის რაიონის ერთ-ერთ სოფელში ცხოვრობს. მას აქვს მძიმე დაავადება, რომლის გამოც, ბავშვის სისხლში თრომბოციტების რაოდენობა ნულამდე ეცემა - შეიძლება თამაშობდეს, კარგად იყოს და უეცრად ცუდად გახდეს, გონება დაკარგოს, მთელი სხეული და სახე გაულურჯდეს და გაითიშოს. თანაც, ეს უკიდურესად გაჭირვებული ოჯახია. როგორც კი გაითიშება, მაშინვე თბილისში მოჰყავთ. გიორგის ყველაფერი გავუკეთეთ, სამკურნალოდ თურქეთშიც გავუშვით და იქაური ექიმების დასკვნა ასეთი იყო - ასაკთან ერთად დაძლევსო. ყველას იმედი აქვს, რომ დაძლევს, მაგრამ ეს აუტანელი შეტევები გრძელდება და ამ დროს ბავშვს მკურნალობა ხომ სჭირდება? თამამად შემიძლია ვთქვა, რომ ამ ოჯახის მთავარი იმედი ცინცაძის ფონდია. გიორგის დედა ჩვენს მზეს იფიცებს და გიორგიც "მეორე დედას" მეძახის.
- კიდევ რა ფორმით ეხმარებით სიმსივნით დაავადებულ ბავშვებს?
- ერთი გადასხმა 6 ათასი ლარი ჯდება. სახელმწიფო ამ წამალს აფინანსებს, მაგრამ ვიდრე ოჯახი განცხადებას შეიტანს, მერე ამას კომისიაზე განიხილავენ და დაამტკიცებენ, ძვირფასი დრო იკარგება. ზოგჯერ ბავშვს გადასხმა 24 საათის განმავლობაში უნდა გაუკეთდეს და ასეთ დროს ჩვენი ფონდის დახმარება შეუცვლელია. როცა წამალი სასწრაფოდ სჭირდებათ, იაშვილის კლინიკიდანაც გვირეკავენ. ამ 24 საათში ფულიც უნდა მოვიძიოთ, წამლის ყიდვაც მოვახერხოთ და პაციენტს მივაწოდოთ. მადლობა ღმერთს, განსაცდელში მყოფი ბავშვებისთვის იმედი არც ერთხელ არ გაგვიცრუებია. ბევრ ბავშვს დახმარება სასწრაფოდ სჭირდება, რადგან პირდაპირ რეანიმაციაში ხვდება. ასეთმა პაციენტმა შეიძლება მგზავრობაც ვერ გადაიტანოს. ამიტომაა საჭირო დახმარება იმ ბავშვებისთვისაც, რომლებმაც თურქეთში იმკურნალეს და უკან დაბრუნდნენ. დღე არ გავა, არ დაგვირეკონ იმ წამლების გამო, რომელიც ონკოლოგიური პაციენტებისთვის აუცილებელია, ძალიან ძვირი ღირს ან საქართველოში საერთოდ არ იყიდება. ზოგიერთ დეფიციტურ მედიკამენტს გერმანიიდან ვიწერთ და ათასნაირად ვწვალობთ, რომ "შვილობილებს" მივაშველოთ. დავუშვათ, პაციენტმა თურქეთში იმკურნალა და ჩამოვიდა, ყველაფერი კარგად დასრულდა, მაგრამ 6 თვეში ერთხელ კონტროლი სჭირდებათ. უკან, თურქეთში დაბრუნება, ბილეთების შეძენა, დაცვითი თერაპიისთვის საჭირო თანხა - ამ ყველაფრის დაფინანსებას ჩვენი ფონდი აგრძელებს. თუ სახელმწიფო ამ ტიპის ხარჯებსაც დააფინანსებს, ამას რა სჯობს.
- ბევრი ბენეფიციარი გყავთ?
- დიახ, სამწუხაროდ! ერთი გორელი ბენეფიციარი გვყავს - ლუკა მერებაშვილი, რომელიც ჯერ 2 წლისაა. სისხლის კიბო აქვს. ოპერაციული ჩარევაც დასჭირდა და კვირაში ერთხელ უკეთებენ ანალიზს, რომელიც მისთვის აუცილებელია. როგორც კი ანალიზი შეიცვლება, მაშინვე თურქეთში უნდა გადააფრინონ, სადაც მკურნალი ექიმი ჰყავს. ლუკას კვირაში ერთხელ უნდა ჩაუტარონ კვლევა, რომელიც 600 ლარი ღირს. ყოველ კვირას ვერ ვახერხებთ, მაგრამ მის ოჯახს ზოგჯერ ვეხიდებით. 6-ათასლარიანი გადასხმა მასაც სჭირდება. შედარებით ძლიერი ოჯახია, მაგრამ იმდენი ხარჯი აქვთ, რომ ამას ვერავინ უძლებს. რა შემოსავალი უნდა გქონდეს, რომ ბავშვს თვეობით და წლობით უცხოეთში უმკურნალო, სასტუმროს ხარჯებს გასწვდე და მისთვის სპეციალური კვების რეჟიმიც უზრუნველყო? ზოგი ფიქრობს, რადგან სახელმწიფო აფინანსებს, დახმარება აღარ სჭირდებათ, მაგრამ ეს შეცდომაა! ონკოლოგია და მით უმეტეს, ბავშვთა ონკოლოგია იმდენად რთულია, რომ ყველა ხარჯს სახელმწიფო ვერ დააფინანსებს. ამ ბავშვებს მუდმივად სჭირდებათ მხარდამჭერი, რომელიც გადასხმის თუ ანალიზის ფულს გადაიხდის და არ დაელოდება, ჯანდაცვის კომისია გადაწყვეტილებას როდის გამოიტანს.
- რა განცდაა, როდესაც ეს ბავშვები უცხოეთიდან კარგი შედეგებით ჩამოდიან?
- ამის სიტყვით გადმოცემა შეუძლებელია; როცა ყველაფერი კარგად დასრულდება, ეს ჩემი პირადი გამარჯვება მგონია. თითოეული ლარი, რომელიც ჩვენს ფონდში ირიცხება, ამ ბავშვებისაა და მათთან მიდის. ჩვენ არ გვაქვს ოფისი, არც საკანცელარიო ხარჯები, ჩვენი "ოფისი" მხოლოდ ტელეფონია, რომელზეც დახმარების მსურველთა ზარები არ წყდება. ამ ბავშვებზე ზრუნვა უდიდეს სტრესთანაა დაკავშირებული, მაგრამ ამ საქმეს მაინც ვაგრძელებთ. კარგია, თუ დროთა განმავლობაში ამ სფეროში ყველაფერი დალაგდება, მაგრამ ჩვენს საზოგადოებას უნდა ვუთხრა - ამ ფონდის არსებობა ჯერჯერობით აუცილებელია.
- ალბათ საზოგადოებას ისიც უნდა ვუთხრათ, რომ კიბო განაჩენი არ არის...
- მართლაც, კიბოს დროული და ხანგრძლივი მკურნალობა სჭირდება, რასაც ხშირ შემთხვევაში, გამოჯანმრთელებისკენ მივყავართ. ყველა ადამიანი უნიკალური და ინდივიდუალურია, ამიტომ ყველას ორგანიზმი თავისებურად ებრძვის დაავადებას. პირველი შოკის შემდეგ, ადამიანმა უნდა იფიქროს, როგორ შეებრძოლოს ამ სენს. მთავარია სწრაფი რეაგირება და გადაწყვეტილების დროულად მიღება.
- დაბოლოს, რას ეტყვით იმ ადამიანებს, რომლებიც ამ ბავშვების გადარჩენაში გეხმარებიან?
- კარგია, რომ ქართველებმა ერთმანეთის მხარში დგომა ვიცით. ჩვენი ფონდი სწორედ ასეთი - კეთილი და ღვთისნიერი ადამიანების იმედად არსებობს! ზოგიერთი მათგანი მხოლოდ 1-2 ლარს გვირიცხავს, ზოგი - 5-ს ან რამდენსაც ახერხებს, რომ განსაცდელში მყოფი პატარა გადაარჩინოს. ზოგი მუდმივად ჩართულია და ყოველთვე რიცხავს. თანადგომის უნარი და სხვისი ტკივილის გაზიარება ნამდვილად შეგვიძლია და ჩვენი ხალხი, ალბათ ამან გადაარჩინა. ზოგჯერ სულ უიმედოდ რომ ვართ, ისე მოულოდნელად გვირიცხავენ სოლიდურ თანხას, რომ ვიჯერებთ - სასწაულები ხდება; რომ საქმე, რომლის ძირიც კეთილია, აუცილებლად მოიზიდავს კეთილ ადამიანებს. ამ ათი წლის განმავლობაში, 4 მილიონ ლარამდე თანხა შემოვიდა და ავადმყოფ ბავშვებზე განაწილდა. ასეულობით ოჯახს დავეხმარეთ და ათეულობით ბავშვი გადავარჩინეთ!
ინტერვიუს ბოლოს მინდა ვთქვა, რომ დიდი სურვილი გვაქვს, ჩვენს საქმიანობაში ახალგაზრდა ჟურნალისტებიც ჩავრთოთ. თუ რომელიმეს სურვილი აქვს, რომ ფონდის წევრი გახდეს, მოხარულნი ვიქნებით. ეს მათ არანაირ ვალდებულებას არ აკისრებს, უბრალოდ, საზოგადოებაში ჩვენი ფონდის ელჩი უნდა გახდეთ, მის გაძლიერებასა და დონაციის მსურველთა მოზიდვაზე იზრუნოთ.
P.S. ვისაც დიმიტრი ცინცაძის ფონდის დახმარება გსურთ, დარეკეთ ნომერზე - 0901080806 ან ჩარიცხეთ თანხა შემდეგ ანგარიშებზე:
GE62BG0000000996577500
GE98TB7517536080100003
ხათუნა ჩიგოგიძე