რატომ უნდა წავიდეთ არჩევნებზე - გზაპრესი

რატომ უნდა წავიდეთ არჩევნებზე

რომ ოქტომბრის არჩევნებში ოპოზიცია "ქართული ოცნების" დამარცხებას შეძლებს. "კონსერვატიული პარტიის" თავმჯდომარე, "გახარია - საქართველოსთვის" პარტიას შეუერთდა.

- ბატონო ზვიად, რამდენიმე დღე დარჩა არჩევნებამდე, როგორ შეფასებთ წინასაარჩევნო გარემოს?

- ძნელი შესაფასებელი არ არის, გაიარეთ ქალაქში და ბილბორდებზე ნახავთ როგორი გარემოა. ვიზუალურად გამოხატული საარჩევნო გარემო გვეუბნება, რომ ძირითადად, ბანერების 90% ხელისუფლებისაა, ხოლო დანარჩენი 10% - ყველა ოპოზიციონერის. ხელისუფლების ამ საარჩევნო ბანერებზე ღიად არის გამოხატული სიძულვილის ენა. როდესაც ოპოზიციის ლიდერები ყელში წაჭერილი მარყუჟებით, გროტესკული გამომეტყველებით არიან გამოსახული. სიძულვილის ენაა, რომელსაც ყველანი ვხედავთ. სამარცხვინოა, როცა უკრაინის ომის უბედურების კადრები ხელისუფლებას უნდა თავისი საარჩევნო აგიტაციისთვის გამოიყენოს. რაც შეეხება სატელევიზიო რეკლამებს, იცით, მე წარმოვადგენ "გახარია - საქართველოსთვის" პარტიას. არსებული კანონმდებლობის მიხედვით, პარტიები, რომლებსაც ბოლო კვლევებში წარმატებული შედეგი აქვთ, როგორც კვალიფიციური სუბიექტები ისე არიან წარმოდგენილი სამართლებრივ სივრცეში და ამ პარტიებს უფასო საეთერო დროც ეკუთვნით, მაგრამ ეს უფასო საეთერო დრო, რომელიც 25 ნომერს ჩვენს პარტიას ეკუთვნოდა, მხოლოდ ერთ ტელევიზიაში გადიოდა და ისიც ჩამოართვა ხელისუფლებამ. ჩათვალა, რომ უფასო საეთერო დრო ოპოზიციურ პარტიებს და მით უმეტეს, "გახარიას პარტიას" არ უნდა ჰქონდეს. უსამართლო საარჩევნო გარემოა. ჩვენი პარტიის მაგალითზე შემიძლია გითხრათ, რომ მცხეთაში მოხდა აღმაშფოთებელი ფაქტი, ჩვენს აქტივისტზე მანქანის დაჯახების მცდელობა იყო. ეს დიმიტრი ხუნდაძის საარჩევნო შტაბის წევრებმა გააკეთეს. ჩვენს ახალგაზრდებს "ქართული ოცნების" ზონდერები დაუპირისპირდნენ მთაწმინდაზე და ეს კადრები ნახეთ ალბათ. მთელი საქართველოს მასშტაბით ასეა, ოპოზიციური პარტიების ოფისებზე თავდასხმები და ასე შემდეგ. ზუსტად ისეთი წინასარჩევნო გარემოა, როგორიც 2012 წელს ჰქონდა "ნაციონალურ მოძრაობას," რომელიც პირდაპირ სატელიტური თეფშების ჩამორთმევაზე იყო გადასული, რომ მართალი სიტყვა ხალხამდე არ მისულიყო. ეს იყო "ნაციონალური მოძრაობის" ხელწერა და ზუსტად იგივე ხელწერა აქვს დღევანდელ მმართველ ძალას. ეს იმაზე მიანიშნებს, რომ ჩვენ რასაც ვებრძოდით 12 წლის წინ, ზუსტად იგივე ვითარება დაბრუნდა.

- მართლა მძიმე საყურებელია უკრაინის ომის კადრები ბილბორდებზე. ბუნებრივია, ეს ხალხზე იმოქმედებს. რატომ დასჭირდა ამ კადრების გამოყენება საარჩევნოდ "ქართულ ოცნებას"?

- 1990 წლის არჩევნებიდან მოყოლებული, ყველა არჩევნებში ამა თუ იმ ფორმით მაქვს მონაწილეობა მიღებული. ხოლო ერთი პერიოდი, შევარდნაძის დროს, როცა საპატიმროში ვიყავით "ზვიადისტები", მაშინ ვერ ვმონაწილეობდი. პირველად ჰყავს საქართველოს ხელისუფლება, რომელიც წინასაარჩევნოდ ხალხს არაფერს ჰპირდება. ეუბნება, - აგერ უკრაინაში ომია და შენ თუ მე არ ამირჩევ, მაშინ ომი იქნება საქართველოშიო. მათ ჰგონიათ, რომ ამომრჩეველი ასეთი ტიპის იაფფასიან დემაგოგიაზე წამოეგება. ხელისუფლების მთავარი პლუსები ამ არჩევნებზე არის ფული, რომელიც მათ განუსაზღვრელი რაოდენობით გააჩნიათ. ასევე აქვთ სამართალდამცავების ბერკეტების უკანონოდ გამოყენების პრაქტიკა.

- წელს ელექტრონულად ტარდება არჩევნები, სოფლებში მცხოვრები არაერთი ადამიანისგან მოვისმინე, ხმა რომ არ მივცე ხელისუფლებას, მიხვდებიან, დანიშნული ექნებათ ბიულეტენებიო. რას ეტყვით ასეთ ამომრჩეველს?

- პირიქით, კონფიდენციალობის თვალსაზრისით ყველაზე დაცული არჩევნებია წელს და ვერავინ ვერაფერს გაიგებს, იქიდან გამომდინარე, რომ უკვე ელექტრონულად არის დაცული, არანაირი ვიზუალიზაცია არ ხდება ამომრჩევლის მიერ გაკეთებული არჩევანის. არ არის იმის საშუალებაც, სურათი გადაუღონ საკუთარ არჩევანს; კაბინეტიც ისეა მოწყობილი, რომ ეს შეუძლებელია. პირველად ხდება საქართველოში ელექტრონული არჩევნები და ეს არის ოპოზიციის უპირატესობა. 2012 წელს, როდესაც ბიძინა ივანიშვილი მოდიოდა ხელისუფლებაში, მაშინ ჯანდაცვის დაზღვევის პროგრამა, აგროპროგრამა, სოციალური პროგრამები ჰქონდა, ბევრი რეფორმის იდეა იყო, ახლა კი ფაქტობრივად, ხელისუფლება არ იწუხებს თავს, რომ მოსახლეობას უთხრას, რატომ უნდა მისცენ ხმა. მათ ჰგონიათ, საქართველოს მოსახლეობა ჭურში ზის. რასაც დღეს ვხედავთ ხელისუფლების მხრიდან ეს საკუთარი ამომრჩევლის მიმართ აგდებული დამოკიდებულებაა.

- ოპოზიციის ლიდერები რას აკეთებთ იმისთვის, რომ ხალხი არ შეშინდეს და თამამად გააკეთონ არჩევანი?

- მაგალითად, ამ დღეებში ვიყავი მარტვილის რაიონში და სააგიტაციო მასალებს ვარიგებდით სოფელ ბანძაში, ბაზარში, შემდეგ დიდიჭყონში. ყველას ვეუბნებოდით, რომ მივიდნენ არჩევნებზე. სიმართლე გითხრათ, შეშინებული ადამიანი მე იქ არ მინახავს. ყველა ცვლილებებისთვის არის მზად. ჩვენი პარტიის პარალელურად, კიდევ ორი ოპოზიციური პარტია მუშაობდა იქ, ასე იყო სხვა რეგიონშიც. ოპოზიციური პარტიის ჯგუფების მუშაობა ველზე არის აქტიური, ეს შემიძლია დაგიდასტუროთ. ეს არ ჩანს ტელეეთერებში, მაგრამ სიცოცხლე იგრძნობა განსაკუთრებით რეგიონებში.

- ბატონო ზვიად, "გახარიას პარტიაზე" რატომ შეაჩერეთ არჩევანი?

- იცით, "ქართულ ოცნებაში" რამდენიმე წელი ვიყავი და იქიდან იმიტომ წამოვედი, რომ რაც იქ ხდებოდა, ჩემთვის მიუღებელი იყო. სწორედ ამიტომ წამოვიდა გიორგი გახარიაც პრემიერ-მინისტრის თანამდებობიდან. აქედან გამომდინარე, ერთნაირი შეხედულებები გვაქვს თემებსა და სიტუაციებზე, ეს ძალიან მნიშვნელოვანია. თუკი ისეთი პოლიტიკური ძალით დაკომპლექტდება მთავრობა, რომელიც არც დღევანდელი და არც წინა ხელისუფლების შემადგენლობით არ იქნება - ეს საუკეთესო ვარიანტია.

- რას ჰპირდებით ამომრჩეველს, თქვენ რატომ უნდა აგირჩიონ?

- არის პროგრამული დაპირებები და მინდა პენსიონერებს ვუთხრა, არიან ოპოზიციური პარტიები, რომლებიც პირდაპირ ამბობენ, რომ მათი არჩევის შემთხვევაში პენსია იქნება 1.000 ლარი. მიმაჩნია, რომ ეს არის სწორი და კარგი მიმართულება. "გახარიას პარტიასაც" აქვს თავისი შეთავაზება პენსიონერებთან. ეს გამოიხატება იმაში, რომ ყოველ წელიწადში, როდესაც ქვეყანაში იქნება ეკონომიკური ზრდა, ამის პროპორციულად გაიზრდება პენსია და ეს იქნება მუდმივად. ის ადამიანები, რომლებიც წლების მანძილზე ემსახურებოდნენ თავის ქვეყანას და მათი პენსიის რაოდენობა აშკარად არ შეესაბამება იმ დამსახურებას, რაც აქვთ, არის ცუდი პრაქტიკა. მათ ეცოდინებათ, რომ პენსიების ზრდა ყოველ წელიწადს იქნება პერმანენტული და ეს თანხა შეიძლება 1.000 ლარი ან უფრო მეტიც იყოს. ოღონდ ეს იქნება მიბმული საბიუჯეტო მონაცემებზე და არ იქნება ხელისუფლებებზე დამოკიდებული. ეს ჩვენ კანონმდებლობითაც უნდა დავადასტუროთ და პარლამენტში შესვლის მერე სწორედ ამის გაკეთებას ვაპირებთ. ვფიქრობ, სამუშაო ადგილების ნაწილიც მნიშვნელოვანია და გიორგი გახარია არის მდიდარი გამოცდილების მქონე კაცი, იყო პრემიერ-მინისტრი, რომელსაც ერთ-ერთ საუკეთესო პრემიერად ასახელებდნენ მაშინ ხელისუფლების წარმომადგენლები და გაუქრათ ეს შეხედულება, როდესაც გახარია გამოვიდა და პირდაპირ თქვა, რომ მისთვის მიუღებელია ის, რაც ხდება და პრემიერ-მინისტრობიდან გადადგა თავისი ზეობის პერიოდში. მისი გეგმა გულისხმობს სამუშაო ადგილების შექმნასაც, მინიმალურ სახელფასო განაკვეთთან დაკავშირებულ საკითხებსა და ა.შ. არასერიოზულს და ზედმეტს ჩვენი არ ვპირდებით მოსახლეობას. რასაც ვპირდებით, ყველაფერზე პასუხისმგებელია. 2024 წლის ოქტომბრის არჩევნები თვისებრივად სხვა არჩევნებია, იმიტომ, რომ ხელისუფლებაში მაღალი ალბათობით მოდის ოპოზიცია და მას შეეძლება ის დანაპირებები, რომელიც გააჩნია, შეასრულოს უკვე როგორც ხელისუფლებამ და დაამთავროს ოპოზიციური საქმიანობა.

- 2012 წელს ერთ-ერთი ლიდერი იყავით, რომელმაც ამ ხელისუფლების მოსვლაში დიდი როლი ითამაშა. დღეს ამ პარტიის წასვლაზე და უარყოფით ნაბიჯებზე საუბრობთ. იქნებ გვითხრათ, ამ მდგომარეობამდე მაშინ რატომ მივედით?

- სიმართლე გითხრათ, ვერასდროს წარმოვიდგენდი, რომ ხელისუფლება, რომელიც მოვიყვანეთ ჩვენ, იმას გაიმეორებდა, რასაც მიხეილ სააკაშვილი აკეთებდა. მოსმენების ნაწილში უკვე გადააჭარბა სააკაშვილის ხელისუფლებას: უსმენენ ყველას და ყველაფერს. ვერ წარმოვიდგენდი, რომ სასამართლოს "ჯიბეში ჩაიდებდა" ეს ხელისუფლება; ვერ წარმოვიდგენდი, რომ თავისი "ჯიბის" ტელევიზიები ეყოლებოდა. გახსოვთ მოდელირებული ქრონიკები და ა.შ. ერთი-ერთში იმავეს აკეთებს ივანიშვილიც. არჩევნების გაყალბების ნაწილშიც გადააჭარბა სააკაშვილს. 12 წლის წინ, ქართველმა ხალხმა უარი უთხრა ავტორიტარულ რეჟიმს და ერთპიროვნულ მმართველობას, მაგრამ 12 წლის შემდეგ სახეზე გვაქვს, რომ საქართველოს პარლამენტი ანგარიშვალდებულია არა ქართველი ხალხის, არამედ ერთი კაცის წინაშე; საქართველოს სასამართლო ხელისუფლება, პროკურატურა ანგარიშვალდებულია არა კანონის წინაშე, არამედ ბიძინა ივანიშვილის წინაშე. "ქართული ოცნება" ხელისუფლებაში ამისთვის არ მოსულა. საგარეო მიმართულებით, დამფუძნებელ დეკლარაციაში შავით თეთრზე გვიწერია, რომ ევროინტეგრაციისკენ, ნატოში ინტეგრაციისკენ მივდივართ და ეს არის ჩვენი საგარეო კურსი. გვეწერა ცალსახად, რომ პარტიული სტრუქტურები მკაცრად გამიჯნული უნდა იყოს სახელმწიფო სტრუქტურებისგან. მეტსაც გეტყვით, ვერასოდეს წარმოვიდგენდი, რომ ბოდიშს მოიხდიდა ხელისუფლება იმისთვის, რომ მთელი ამ წლების განმავლობაში საქართველოს ტერიტორიული მთლიანობის შესანარჩუნებლად იბრძოდა. ვერ წარმოვიდგენდი, ქვეყნის პრემიერ-მინისტრი გამოვიდოდა და იტყოდა, რომ ომი საქართველომ დაიწყო 2008 წელს და რუსეთი იძულებული გახლდათ, ჩართულიყოო. წარმოიდგინეთ, იმ 4 სახელმწიფოს გარდა, რომელსაც აქვს აფხაზეთი და სამხრეთი ოსეთი აღიარებული, რომ იყოს გაცილებთ მეტი. ამის სადარაჯოზე ამერიკის შეერთებული შტატები და ჩვენი ევროპელი პარტნიორები იდგნენ. რასაც ხელისუფლება დღეს აკეთებს, ამით მიგვაქანებენ რუსეთისკენ. არადა, ეროვნული მოძრაობიდან დაწყებული, ზვიადის და მერაბის ლიდერობით საქართველო ცდილობდა გამოსულიყო რუსული ორბიტიდან და ჩვენ გაქვს დღეს ასეთი სიტუაცია, რომ ისევ გვაბრუნებენ ამ ორბიტაზე, რასაც საშინელ კოშმარშიც კი ვერ წარმოვიდგენდი. ამას არ მალავს ხელისუფლება და ამბობს, დიახ, ყველა ოპოზიციონერი უცხოეთის აგენტია ან დასავლეთის ქვეყნების აგენტები და მათგან არის ეს ქვეყანა გადასარჩენიო. ამით ისინი უპირისპირდებიან მთელ დასავლეთს, ამერიკას. რასაც აკეთებს ხელისუფლება, ეს სამარცხვინო საქციელია.

- საინტერესოა თქვენი აზრი პრეზიდენტ სალომე ზურაბიშვილის შეთავაზებაზე. რას იტყვით დროებითი მთავრობის შექმნის იდეაზე?

- გიორგი გახარიას პარტიის გზავნილი არის, ისე გავუშვათ "ქართული ოცნება" ხელისუფლებიდან, რომ უკან არ დაბრუნდეს "ნაცმოძრაობა" და მიხეილ სააკაშვილი. ჩვენთვის საინტერესოა ყველაფერი, ოღონდ არჩევნების შემდეგ. რადგან ახლა მკვეთრმა მოძრაობამ შეიძლება გამოიწვიოს ოპოზიციური ამომრჩევლების დაბნევა და დღეს თუ ვინმეს არ აწყობს ამომრჩევლის დაბნევა, ვფიქრობ, ერთ-ერთი პირველი სალომე ზურაბიშვილია.

- იმ ხალხს რას ეტყვით, ვისაც ჯერ არა აქვს გადაწყვეტილი, რომელ პარტიას მისცეს ხმა?

- თუ მოსწონთ, რა მდგომარეობაა დღეს ქვეყანაში სოციალური, ეკონომიკური, საერთაშორისო თვალსაზრისით, მაშინ მივიდნენ და დაუჭირონ მხარი ხელისუფლებას. თუ არ მოსწონთ, დაუჭირონ მხარი ოპოზიციურ პარტიებს. ოპოზიციური პარტიების დიდი არჩევანია და მე, რა თქმა უნდა, ვურჩევდი, მხარი დაუჭირონ იმ პარტიას, რომელიც ამბობს, ისე უნდა გავუშვათ ხელისუფლებიდან "ოცნება", რომ უკან არ დავაბრუნოთ მიხეილ სააკაშვილი. მაგრამ მთავარია, ხელისუფლებას არ დაუჭირონ მხარი, თუ არ მოსწონთ ქვეყანაში არსებული ვითარება.

- თქვენ კითხულობთ ლექციას უნივერსიტეტში და ყოველდღიური შეხება გაქვთ ახალგაზრდებთან. რა განწყობაა სტუდენტებში?

- სტუდენტების აქტიურობა არის უჩვეულო. მე არ მახსოვს არჩევნებზე ამ სეგმენტს რაიმე თვისებრივი გადაწყვეტილება მიეღოს, მაგრამ ახალგაზრდობამ უკვე იცის, რომ თუ ისინი პასიურ მდგომარეობაში იქნებიან, ასეთ დროს შესაძლებელია ჩვენი ევროპული არჩევანი სერიოზული რისკის ქვეშ დადგეს. აქედან გამომდინარე, მათი აქტივობა, რომელიც სახეზეა, ძალიან არგუმენტირებულია. კარგად იციან, რატომ უნდა მივიდნენ არჩევნებზე. მარტო ჩემს სტუდენტებზე არ ვამბობ, ჩემი შვილებიც სტუდენტები არიან. მე ვმეგობრობ ახალგაზრდებთან და ვიცი მათი განწყობა, ყველანი აპირებენ არჩევნებზე წასვლას.

zviadis-ojaxi-1729440245.jpg

- თქვენი შვილები უკვე დიდები არიან, თუ ისურვებდით თქვენს შვილებს პოლიტიკაში?

- 5 შვილი მყავს, სამი უკვე სტუდენტია, სტუდენტობის პარალელურად მუშაობენ, ორი ჯერ კიდევ სკოლაში სწავლობს. ჩვენ ძიძიგურები ერთი გუნდი ვართ და რწმენით ვუყურებთ მომავალს. ზრდასრული ადამიანები არიან და ვფიქრობ გამოადგებიან ჩვენს ქვეყანას. განათლება, რასაც მიიღებენ, საკუთარ ქვეყანას უნდა მოახმარონ.

ჩემი შვილები გაიზარდნენ კონსერვატიულ ოჯახში, სადაც სტუმარი, მასპინძელი, დედა, მამა, ქალი, კაცი, ცოცხალი, წასული ადამიანი, ჩვენთან არის ყველაფერი ტრადიციულად. ოღონდ არასდროს ვლაპარაკობდი სახლში პოლიტიკაზე, უბრალოდ ისინი ხედავდნენ როგორ ვცხოვრობდი, როგორი იყვნენ ჩემი მეგობრები. გადაწყვეტილება მათი მისაღებია, ყველანი არიან ზრდასრული ადამიანები. 22-21-20 წლისები და მათ გადაწყვეტილებებში თუ რა უნდათ ხვალ და ზეგ, არ ჩავრეულვარ და არც მომავალში ვაპირებ ჩარევას. თუ მიიღებენ გადაწყვეტილებას, რომ ჩაერთონ პოლიტიკურ ცხოვრებაში, მე მხოლოდ მოხარული ვიქნები, იმიტომ რომ ვფიქრობ, ისეთი ღირებულებების მატარებელი ადამიანები, როგორიც არიან ჩემი შვილები, ძალიან კარგ და პოზიტიურ როლს ითამაშებენ ქართულ პოლიტიკაში. მაგრამ კიდევ ერთხელ გეტყვით, რომ მე არ ვერევი მათ გადაწყვეტილებაში და არც მომავალში ვაპირებ მაგის გაკეთებას.

- თქვენ არაერთი მოწვევის პარლამენტის დეპუტატი ხართ, თქვენი გამოცდილებიდან გამომდინარე თუ ისურვებდით მათ ყოფნას პოლიტიკაში?

- რატომაც არა, ვისურვებდი, იმიტომ რომ კონსერვატიული მიმართულება ქართულ პოლიტიკაში არის გასაძლიერებელი. კონსერვატიული მიმართულების ადამიანები სამწუხაროდ მარტო ამ კუთხით არ აქტიურობენ, რუსეთისკენ აქვთ გადახრები, ამიტომ მე ვფიქრობ, რომ კონსერვატიული ხაზი გააძლიერო და თან დასავლური საერთაშორისო მიმართულების მხარდამჭერი იყო, ეს მიმართულებები გასაძლიერებელია ქვეყანაში. თუმცა კიდევ ერთხელ ვამბობ, ეს მათი გადასაწყვეტია. ისინი უკვე სრულწლოვნები არიან, მაგრამ ჩვენ მაინც ახლაც არ ვსაუბრობთ პოლიტიკაზე. თუმცა ვიცი, რომ ჩემი ჩარევის გარეშე ისინი დადიოდნენ რუსული კანონის საწინააღმდეგო აქციაზე, ერთგულად, მუდმივად. დადიოდნენ იმიტომ, რომ ისინი ევროპული მიმართულებით ხედავენ საქართველოს განვითარებას და არა რუსული მიმართულებით. ახალი თაობა არ აღიარებს რუსეთს, როგორც პარტნიორს, რაღაც პერსპექტივის მქონე ქვეყანას, რაც საქართველოს რაიმე სიკეთეს მოუტანს, არანაირი ნოსტალგია რუსეთთან მიმართებით არ გააჩნიათ დღევანდელ ახალგაზრდებს, ევროპულად არიან გაზრდილები, ევროპული ცხოვრების წესით ცხოვრობენ. არიან ჩართული იმ სივრცეებში, რომელიც ევროპაშია, მეგობრობენ ევროპელებთან. უვიზო მიმოსვლაც ძალიან ხელშემწყობია. მარტო გერმანიაში ჩატარებული ფეხბურთის ჩემპიონატი ავიღოთ, ახალგაზრდები ისე იოლად მიდიოდნენ, რომ მე ასე იოლად სამტრედიაში ვერ წავალ. იქაც ქართულ საქმეს აკეთებდნენ, გულშემატკივრობდნენ საქართველოს ნაკრებს. ამ ხალხს ვერ წაიყვან რუსეთისკენ, ეს გამორიცხულია. რამდენიც არ უნდა სცადოს ივანიშვილის მარიონეტულმა მთავრობამ, ამას ისინი ვერ გააკეთებენ.

თეა ხურცილავა