რით ამაყობს თორნიკე შენგელიას მეუღლე
საქართველოს ეროვნული საკალათბურთო ნაკრების წევრი - თორნიკე შენგელია მეუღლესა და შვილებთან ერთად ყოველ ზაფხულს საქართველოს სტუმრობს. წყვილი ამჟამად ესპანეთში ცხოვრობს. "ვამაყობ თორნიკეს შრომისმოყვარეობითა და მიზანდასახულობით. მისი წარმატების საიდუმლო სწორედ ამ თვისებებშია", - მითხრა კალათბურთელის მეუღლემ.
- სალომე, სად გაატარეთ ზაფხული?
- ყოველ აგვისტოს საქართველოში ჩამოვდივართ. წელსაც არ დავარღვიეთ ტრადიცია, თან - "საქართველო-ლიტვის" თამაშიც დაემთხვა. მოგეხსენებათ, ეს მატჩი მოვიგეთ და ძალზე გახარებულები ვართ.
- დასვენების დღეებს როგორ ატარებთ?
- დასასვენებლად ხშირად ბავშვებთან ერთად მივდივართ. თუმცა, ცოტა დროს იმისთვისაც ვიტოვებთ, მარტოებმა რომ დავისვენოთ. ხომ იცით, ბავშვებთან ერთად სრულყოფილად დასვენებას ვერავინ ახერხებს. ჩვენი შვილები კი პატარები არიან და განსაკუთრებული ყურადღება სჭირდებათ.
- ზღვა თუ მთა - რომელს ანიჭებ უპირატესობას?
- ორივე მიყვარს, ორივეს თავისებური ხიბლი აქვს. მთაში სულიერად ვმშვიდდები და ვწყნარდები, ზღვაზე უფრო ვერთობი. ვთვლი, რომ ორივე საჭიროა.
- როგორ დასვენებას ანიჭებ უპირატესობას - აქტიურს თუ ე.წ. პენსიონერულს?
- არ მიყვარს აქტიური დასვენება, მშვიდ გარემოში ყოფნა მირჩევნია. ხმაური ძალიან მღლის, დისკომფორტს მიქმნის.
- ზღვაზე ყოფნის დროს კლუბში თუ დადიხარ? ცეკვა გიყვარს?
- ცეკვა მიყვარს, მაგრამ კლუბში წასვლის განწყობილება იშვიათად მაქვს.
- ექსტრემალური გართობები თუ გიყვარს? მაგალითად, პარაშუტით ფრენა და ა.შ.
- ინტერესი მაქვს და ცხოვრებაში ერთხელ მაინც მინდა, რაიმე ექსტრემალური გამოვცადო. თუმცა, არ ვიცი, ამას რამდენად შევძლებ. ცოტა არ იყოს, მშიშარა ვარ.
- დასასვენებლად დიდი ბარგით მიდიხარ ხოლმე?
- კი, ვცდილობ ყველაფერი წავიღო, რაც შეიძლება დამჭირდეს.
- ზღვაზე ყოფნისას, ყველაზე კომფორტული სამოსი რა არის შენთვის?
- ყველაზე კომფორტული საცურაო კოსტიუმზე მოსაცმელი თხელი სამოსია.
- საცურაო კოსტიუმის შერჩევისას, ფერს ანიჭებ უპირატესობას თუ დიზაინს?
- ორივე უნდა მომეწონოს. შეიძლება, კარგი დიზაინი ჰქონდეს და ფერი არ მომეწონოს, ამის გამო დავიწუნო.
- გასარუჯად სოლარიუმს თუ სტუმრობ?
- გარუჯული კანი მიყვარს, მაგრამ პროცესი იმდენად არ მომწონს, რომ ყოველთვის მინიმალური ნამზეური მაქვს, "შემთხვევით" მიღებული (იცინის). სოლარიუმში არ დავდივარ. ჯანმრთელობა ჩემთვის ყველაზე მნიშვნელოვანია.
- თორნიკე საკმაოდ წარმატებული კალათბურთელია. როგორ ფიქრობ, რა არის მისი წარმატების საიდუმლო?
- მისი წარმატების საიდუმლო საქმის სიყვარულსა და დაუღალავ შრომაშია.
- როგორი მეუღლეა? საოჯახო საქმეებში თუ გეხმარება?
- საოჯახო საქმეებისთვის ნაკლებად სცალია, მაგრამ როგორც კი ამის საშუალება ეძლევა, ყოველთვის მეხმარება. ხვდება, როდის მჭირდება მისი დახმარება და დროსაც გამონახავს ხოლმე.
- შვილები თუ დაგყავს თამაშებზე?
- როგორ არა!.. მათ ძალიან უყვართ თამაშის ყურება და საოცრად გულშემატკივრობენ მამიკოს.
- უფროსი რამდენი წლისაა?
- უფროსი - კახი 3 წლისაა, უმცროსი - ლაზარე კი 2-ის.
- ხშირად ჩხუბობენ?
- არა, ერთმანეთს არ ერჩიან, მაგრამ ძალიან ცელქები და მოუსვენრები არიან.
- დამხმარე გყავს თუ მათ დამოუკიდებლად ზრდი?
- დამხმარე მყავს, მაგრამ ბავშვებთან ძირითადად, მე ვარ, დამხმარე ქალბატონი სახლის საქმეებში მეხმარება.
- გარდა ბავშვების აღზრდისა, კიდევ რით ხარ დაკავებული?
- ახალ პროფესიას ვეუფლები. მინდა, ინტერიერის დიზაინერი გავხდე. ეს პროფესია არა მარტო უცხოეთში, ჩვენს ქვეყანაშიც პერსპექტიულია.
- ზაფხულში ლაშქრობებზე სიარული თუ გიყვარს?
- კი, ძალიან მიყვარს, ბუნებასთან კონტაქტი ჩემთვის სასიამოვნო და შთამბეჭდავია. ხშირად ვსეირნობთ ბუნებაში, შვილებთან ერთად, რაც კარგი "რელაქსია".
- ყოველდღე ზრუნავ სხეულის გაჯანსაღებაზე?
- ვარჯიში ჩემი ცხოვრების განუყოფელი ნაწილია. ყოველთვის ვცდილობ, დღის განმავლობაში მსუბუქად მაინც ვივარჯიშო.
- მეუღლეს გემრიელი კერძებით ხშირად ანებივრებ?
- გემრიელი კერძების მომზადება ყოველთვის მსიამოვნებს. მიხარია, რომ თორნიკეს ჩემი ნახელავი ყოველთვის მოსწონს.
- ქართული ტრადიციული კერძების მომზადება იცი?
- რაღაცების მომზადება ვიცი, მაგრამ მაინც ვერ ვიტყვი, რომ საუკეთესო დიასახლისი ვარ. ვამზადებ: საცივს, ხაჭაპურს, ჩაქაფულს და ა.შ.
- საკმაოდ რთულად მოსამზადებელია საცივიც, ხაჭაპურიცა და ჩაქაფულიც...
- მთავარი მონდომება და სურვილია. თორნიკეს მოსწონს ჩემი მომზადებული სადილები და ამიტომ ყოველთვის ვცდილობ გავანებივრო.
- ზამთარში თუ ცდილობთ დასვენების დღეები მოიწყოთ?
- კი, ყოველ ზამთარს, ბავშვებთან ერთად მთაში მივდივართ დასასვენებლად. ეს პირველ რიგში, პატარების ჯანმრთელობისთვისაა კარგი და ჩვენთვისაც - ხომ იცით, ენერგიის აღდგენა ერთდღიანი დასვენებითაც შესაძლებელია.
- შეგიძლია, ყველაზე კარგი ზაფხული გაიხსნო?
- ასე გამორჩეულად ჩვენი ქორწინების წინა პერიოდის ზაფხული მახსენდება, როცა საქორწილო სამზადისი გვქონდა (იღიმის). საერთოდ, ზაფხული ძალიან მიყვარს და ვფიქრობ, ყველა ზაფხულს შთამბეჭდავად და საინტერესოდ ვატარებთ.
- ალბათ, უამრავ ქვეყანაში ხარ ნამყოფი. რომელია შენთვის ყველაზე დაუვიწყარი?
- ყველაზე მეტად ინგლისი მიყვარს, მაგრამ საქართველო განსაკუთრებულია. აქ ბევრი ჩვენთვის საყვარელი ადამიანი გვყავს და როგორც კი საშუალება გვეძლევა, ყოველთვის ჩამოვდივართ. მე და თორნიკე ვამაყობთ ჩვენი ქვეყნით.
სოფო ჭონიშვილი