"მახარებს, რომ უამრავ ოჯახში ჯანსაღი და გემრიელი პური ცხვება"
font-large font-small
"მახარებს, რომ უამრავ ოჯახში ჯანსაღი და გემრიელი პური ცხვება"
როგორ მოვამზადოთ ბუნებრივი საფუარი

ნინო მათურელმა დაახლოებით 10 წლის წინ ინტერნეტში მოიძია ინფორმაცია ბუნებრივი საფუვრით პურის ცხობის შესახებ. მას შემდეგ უამრავი სახეობის პური გამოაცხო და დააგემოვნა. რეცეპტებს არ მიჰყვება ზუსტად, საკუთარი ინტერპრეტაციით ცვლის და ექსპერიმენტებიც ამართლებს. ნინო მეუღლესთან და შვილებთან ერთად, ბარსელონასთან ახლოს, ერთ პატარა სოფელში ცხოვრობს.


- წლებია, ოჯახთან ერთად ესპანეთში ვცხოვრობ. 18 წლის ვიყავი, აქ რომ ჩამოვედი, 1998 წელს. უცხო ენების ფაკულტეტზე ვსწავლობდი, მაგრამ გავთხოვდი - საქართველოში დავინიშნეთ, მალე ჩემი მეუღლე ესპანეთში წამოვიდა და მეც გამოვყევი. ჯერ ერთი შვილი მეყოლა, მერე - მეორე და სწავლისთვის ვეღარ მოვიცალე. ქალ-ვაჟი მყავს: ნინი 15 წლისაა, ლუკა - 21-ის. დღემდე მიჭირს იმ წლებზე საუბარი, იმდენად რთული იყო, იმხელა ნოსტალგია მქონდა, ვერ წარმოიდგენთ. ყველასა და ყველაფერს რომ დატოვებ, ძნელია. თან, მაშინ არც ინტერნეტი იყო, ფაქსით ვწერდი დედაჩემს, იშვიათად ვახერხებდი დარეკვას, მისი ხმა რომ გამეგონა. რეცეპტებსაც ფაქსით მიგზავნიდა, რადგან მანამდე, სამზარეულოსთან შეხება არ მქონია და ბევრი არაფრის გაკეთება არ ვიცოდი. დედა კარგი კულინარია, "გემრიელი ხელი" აქვს, საუკეთესო ნამცხვრებს აცხობს და ალბათ მეც მისგან გამომყვა ცხობის სიყვარული. როდესაც პური პირველად გამოვაცხვე, ამან დიდი სიამოვნებაც მომანიჭა და გემრიელი პურის გემოც გავიგე. საინტერესო ის იყო, რომ თვითონ დავამზადე საფუარიც, არანაირი ქიმიური მინარევი არ გამომიყენებია - ფქვილით, წყლითა და მარილით.
GzaPress
- ბუნებრივ საფუარში ძველისძველ წესს გულისხმობთ? მახსოვს, ბებია ცომის გუნდას თიხის ქოთანში ინახავდა, შემდგომში გამოსაყენებლად.
- დიახ, გადმოცემით ვიცი, რომ ძველად ხალხი ასე აკეთებდა საფუარს, იღებდნენ ცომს, რომელიც დროთა განმავლობაში მჟავდებოდა. ბუნებრივი საფუარი ახლა შეგვიძლია გამოვიყვანოთ სვიაზე, ნებისმიერი სახეობის ხილზე. ბოლო დროს უფრო ხილის ბაზაზე ვამზადებ, ხშირად - ვაშლითა და ქიშმიშით. ვიღებ 200 მლ წყალს, 40 გ ქიშმიშს და ნახევარ ვაშლს. ვაშლი უნდა იყოს ტკბილი, მჟავე არ გამოდგება. შეიძლება, 1 ჩ/კ თაფლიც დავუმატოთ. ვდგამ თბილ ადგილას და ვაცდი, რომ ადუღდეს, ოღონდ არ უნდა ამჟავდეს. თუ სითბოა, 3 დღეში უნდა გადავწუროთ ნაყენი და ხილი გადავყაროთ. ამ ნაყენით ვიწყებ საფუვრის დაყენებას. პირველ ეტაპზე 50 გ ფერმენტირებულ ხილის ნაყენს ვამატებ 50 გ პურის ფქვილს (თუ ცეხვილს გამოიყენებთ ან ჭვავს, უკეთესია), ვურევ კარგად და ვაჩერებ 4 საათით თბილ ადგილას. მე-2 ეტაპზე ვამატებ 100 მლ წყალს, 100 გ ხორბლის უმაღლესი ხარისხის ფქვილს, ვურევ კარგად და ვაჩერებ 5-6 საათს. მე-3 ეტაპზე კი წინა ეტაპებიდან გაკეთებულ "ფაფას" ვაკლებ 200 გრამს, ვუმატებ ისევ 100 გ ფქვილს და 100 მლ წყალს. ვურევ და მთელი ღამე ვტოვებ. ამ სამი ეტაპის შემდეგ მივიღებთ 300 გ ბუნებრივ საფუარს. ყოველ 500 გ ფქვილზე 200 გ საფუარი იხმარება, ზაფხულში - ნაკლებიც, დანარჩენს მაცივარში ვინახავთ მაქსიმუმ 3 დღით. თუ ყოველდღე პურს აცხობთ, მაშინ აღარ არის საჭირო მაცივარში შენახვა. მაცივრიდან გამოღებულ საფუარს ოდნავ თბილი წყლით ვკვებავთ, ვაცდით, კარგად რომ ამოვა და შემდეგ ვიყენებთ. შეგიძლიათ ეს ყველაფერი ღამით გააკეთოთ, დილით კი უკვე მზად იქნება. ყოველ ჯერზე დაიტოვებთ საფუარს გასაახლებლად. შეგიძლიათ, მარტო 50 გ დაიტოვოთ. ბუნებრივი საფუვრით მომზადებულ ცომს 6 საათი მაინც სჭირდება, გამოსაცხობად რომ იყოს მზად. პროცესი მიდის ნელა, მაგრამ გემრიელი და არომატული გამოდის, ასეთი პური დიდხანსაც ინახება და ბევრი სასარგებლო თვისებაც აქვს. ჩვეულებრივ, გაზქურაში ვაცხობ, თუჯის ქვაბში ყველაზე კარგად ცხვება, ზედაპირს ვსერავ და თავსახურს ვაფარებ. მოკლედ, სულ ფქვილიანი მაქვს ხელები. მასტერკლასიც გავიარე, მაგრამ ექსპერიმენტები მიყვარს და ვცდილობ, რაღაც ჩემიც შევიტანო, მზამზარეულ რეცეპტებს არ მივყვები.
GzaPress
- ნინო, კიდევ რა უნდა გაითვალისწინო პურის ცხობისას?
- ცომის მოზელიდან გამოცხობამდე ბევრი რამ არის გასათვალისწინებელი - წყლის, ოთახის, ღუმლის ტემპერატურა. ყველაზე მთავარი კი მოთმინება და სიყვარულია, წინააღმდეგ შემთხვევაში, კარგი პური არ გამოგივა. პურის ცხობა დაგეგმვას მოითხოვს, სახელდახელოდ კი არ უნდა მოზილო ცომი, წინადღეს უნდა დაიწყო ზრუნვა და სამზადისი. მხოლოდ კარგი საფუარი არ არის საკმარისი, აუცილებელია კარგი ფქვილიც. უნდა იყოს ნატურალური, დანამატების გარეშე და თუ წყლის წისქვილზეა დაფქული, მაშინ საუცხოო პური გამოდის. სხვადასხვა წისქვილიდან ვიწერ ხოლმე ფქვილს. როდესაც ბუნებრივი საფუვრის უპირატესობაზე ვსაუბრობ, ეს არ ნიშნავს იმას, რომ საფუვრიანი პური მომწამვლელია, გააჩნია, რა დოზით იყენებ.
- ესპანელებსაც ჩვენსავით უყვართ პური?
- ესპანელებსაც უყვართ პური და ძალიან ბევრი, კარანტინის პერიოდში, შინ აცხობს. ბევრნაირ პურს აცხობენ, ფანტაზიას საზღვარი არა აქვს - ყველის, კარტოფილის, მარცვლეულის დამატებით, პური ნიგვზითა და ქიშმიშით და ა.შ. ვერ წარმოვიდგენდი, მოტკბო პური თუ მომეწონებოდა და შევჭამდი, მაგრამ ერთ-ერთი საუკეთესოა პური ნიგვზითა და ქიშმიშით, ჭვავის საფუარზე დამზადებული. უკვე კარგა ხანია, პურს იშვიათად ვყიდულობ მაღაზიაში. ოჯახის წევრებს ძალიან მოსწონთ ჩემი ნახელავი, ჩემი მეუღლე პირველი შემფასებელია. ყოველი ახალი სახეობის პურის დაგემოვნებისას ამბობს, რომ ამაზე უკეთესი არ არსებობს და ასეთი კარგი ჯერ არ გამოგიცხვიაო. სადილის კეთებაზე მეტ სიამოვნებას ცხობა მანიჭებს. შემიძლია, უქმე დღეები სამზარეულოში გავატარო. თან, არ მიყვარს, როცა სხვა მეხმარება, არავინ არ უნდა მომეკაროს. აი, ასე გავიფქვილიანე ხელები მეც და სხვებსაც მოვანდომე პურის ცხობა. რაკი ბევრი მწერდა რეცეპტების შესახებ, ამიტომაც გავაკეთე ბლოგი სახელწოდებით "ფქვილიანი ხელები" და ძალიან მახარებს, რომ უამრავ ოჯახში ჯანსაღი და გემრიელი პური ცხვება.

ნინო მათურელის რეცეპტებიდან:
- ეს ჩემი უსაყვარლესი სენდვიჩის პურია, რეცეპტი დაკარგული მქონდა და აღვადგინე. ამ პურის საიდუმლოა ფქვილის ფაფა "ტანგსონგი" - იაპონური ტექნიკაა, რომელსაც პურეულში და ფუნთუშეულში იყენებენ, ის პურს უნარჩუნებს ტენიანობას და მალე არ შრება. ამ ფაფას წინასწარ ვამზადებთ:
1 წილ ფქვილზე 5 წილი წყალი უნდა; დავდგამთ დაბალ ცეცხლზე და მივიყვანთ 65 გრადუსამდე. თუ თერმომეტრი არ გაქვთ, მაშინ აცადეთ, რომ კარგად შესქელდეს, ოღონდ არ უნდა აგიდუღდეთ. ვაფარებთ სამზარეულოს ცელოფანს და ვაცდით გაცივებას. ცომისთვის გვჭირდება: 475 გ უმაღლესი ხარისხის ფქვილი, 15 გ რძის ფხვნილი, 25 გ შაქარი, 195 მლ წყალი (წყლის რაოდენობა ფქვილის ხარისხზეა დამოკიდებული, ამატეთ ნელ-ნელა, ცომი არ უნდა იყოს თხელი), 155 გ ფქვილის ფაფა "ტანგსონგი", 9 გ მარილი, 10 გ დაწნეხილი საფუარი და 40 გ კარაქი.
მოვზელთ ყველაფერს, კარაქის გარდა. როცა ცომი ცოტა ელასტიკური გახდება, დაამატეთ კარაქი და გააგრძელეთ ზელა, სანამ გლუტენი კარგად არ განვითარდება. აიღეთ ცომის პატარა ნაჭერი და ხელით გაწელეთ; თუ ცომი გაიხა, ესე იგი, დამუშავება აკლია, ხოლო თუ გაიწელა, აღარ უნდა ზელა. ცომი უნდა იყოს ელასტიკური და პრიალა. რომ გაფუვდება, გადავზელთ და მივცემთ ცილინდრის ფორმას. რაც ნაკლები ჰაერი შეჰყვება, უკეთესია: ცხობის დროს დიდ ნასვრეტებს არ გაიკეთებს. აცადეთ კარგად გაფუება, რადგან თუ გაფუება დააკლდება, ცხობის დროს გვერდები გაეხსნება. ღუმელი გაახურეთ 175 გრადუსზე და გამოაცხვეთ მარტო ქვედა წვის რეჟიმით.

ჭვავისა და ხორბლის პური ქიშმიშითა და ნიგვზით. ინგრედიენტები: 150 გ ჭვავის ბუნებრივი საფუარი, 400 გ ფქვილი, 100 გ ჭვავის ცეხვილი ფქვილი (რუხი), 350 გ წყალი, 15 გ შაქრის ლერწმის თაფლი ან ჩვეულებრივი თაფლი, 10 გ მარილი, 125 გ ქიშმიში და 125 გ ნიგოზი.
წყალში გავხსნათ თაფლი და საფუარი, დავუმატოთ ფქვილი, მარილის გარდა და მოვზილოთ. დავუმატოთ მარილი. კიდევ მოვზილოთ ცოტა ხანს. შემდეგ შევურიოთ კარგად გარეცხილი და გამშრალი ქიშმიში და მსხვილად დაჭრილი ნიგოზი. მოვაგუნდაოთ ცომი, ჩავდოთ ცხიმწასმულ ჯამში, თავზე დავაფაროთ ცელოფანი და ასაფუებლად თბილ ადგილას მოვათავსოთ, 4 საათით მაინც. გადმოვიღოთ ფქვილმოყრილ მაგიდაზე, მივცეთ მოგრძო ფორმა და დავაცადოთ, რომ კიდევ ამოვიდეს. ცხობის წინ დავუსეროთ ზედაპირი. პირველი 10 წუთი 250 გრადუსზე ვაცხოთ, ქვედა წვითა და ორთქლით (შეგიძლიათ, ჯამით დაუდოთ ადუღებული წყალი), ხოლო 40 წუთი 200 გრადუსზე, ზედა-ქვედა წვით.

ძალიან გემრიელია იისფერი სიმინდის პურიც, რომლისთვისაც დაგვჭირდება: 230 გ დედა ცომი, 300 გ ხორბლის ფქვილი, 100 გ ხორბლის ცეხვილი, 100 გ იისფერი სიმინდის ფქვილი, 450 მლ წყალი და 10 გ მარილი.
სიმინდის ფქვილს (სიმინდის ფქვილი დამდუღვრის წინ მოვხალე) დავასხამთ 250 გ ადუღებულ წყალს, მოვურევთ და დავუცდით გაცივებას. ჯამში მოვათავსოთ ყველაფერი, მარილის გარდა. მოვზილოთ და 40 წუთით გავაჩეროთ. დავუმატოთ მარილი და კვლავ მოვზილოთ. მე ნელ-ნელა დავუმატე წყალი, რამდენიც შეიზილა. 4 საათის განმავლობაში ცომი 3-ჯერ გადავკეცე და მაცივარში მოვათავსე დილამდე. დილით ფორმა მივეცი და კვლავ მაცივარში შევაბრუნე, ამჯერად 7 საათით. გამოვაცხვე ქვაბში, პირველი 20 წუთი თავსახურით და შემდეგ - უთავსახუროდ.
ნინო ჯავახიშვილი
ბეჭდვაელფოსტა
კომენტარები (0)
კომენტარი არ გაკეთებულა
ამ კატეგორიის სხვა სიახლეები
სირიელი ფოტოგრაფი, რომელიც გერმანიაში ქართული კულტურით დაინტერესდა
"მგონია, იტყუებიან, როცა ბავშვის დაბადებამდე ამბობენ, - უკვე მიყვარსო"
"როგორც კი ადამიანს ასწავლი საჯაროდ გამოსვლას, უკვე წარმოიდგენს, რომ თავზე შარავანდედი ადგას"
ბავშვობიდან ცხოველებით ვიყავი გატაცებული
შემთხვევითი ემიგრანტის წარმატება ამერიკაში
ამერიკელმა მწერალმა ქალმა - ენ სეირმა როზალინდ ფრანკლინის ნამდვილი ბიოგრაფია დაწერა და სამართლიანობა აღადგინა
"ქუჩაში გაყრილი თოჯინების მერე გიკვირთ, რომ ბავშვებს კლავენ ან თვითმკვლელობამდე მიიყვანენ ხოლმე?!"
"ბარმენი განათლებული უნდა იყოს, რომ ყველა თემაზე გესაუბროს"
"მიკვირს, ასეთ ქვეყანაში გაზრდილი ადამიანები აქ ასე რატომ იქცევიან..."
კვირის სიახლეები
"ასე უჭირს ერს და ბერს, რომ 11-სულიანი ოჯახი ქუჩაში არ დავტოვოთ?!"
მამა ათანასეს დახმარება სჭირდება
2538 კომენტარი
სპორტსმენი იატაკქვეშეთიდან
ხელოვნების რანგამდე აყვანილი სპორტის სახეობა, რომელიც ცხოვრების წესს გიცვლის
2658 კომენტარი
"ქალს სათქმელს ეტყვი, კაცს კი უნდა გაულაწუნო"
რით დაიმსახურა ორმა მამაკაცმა ასმათ ტყაბლაძისგან სილის გაწნა
9 კომენტარი
"ფრაზა "შენ უფრო ჩაცმული ხარ", ჩვენს სახლში ხშირად ისმის"
ნინო მუმლაძის თავს გადახდენილი მხიარული ამბები
6 კომენტარი
"გაუნათლებელი ადამიანი ყველა დროში საცოდავად გამოიყურება"
ია სუხიტაშვილი შვილებსა და საკუთარ თვისებებზე
4 კომენტარი
"ზოგჯერ ჯიბეში სამგზავრო ფულიც არ მქონია"
რა ბიზნესი წამოიწყო ნინი ონიანმა
4 კომენტარი
სახსრებში მამტვრევს. ალბათ ბედნიერების ნიშანია.