გზა რთული ბავშვობიდან წარმატებულ სამოდელო კარიერამდე - დიასახლისობითა და მიზანდასახულობით მისაბაძი ლამაზმანი
font-large font-small
გზა რთული ბავშვობიდან წარმატებულ სამოდელო კარიერამდე - დიასახლისობითა და მიზანდასახულობით მისაბაძი ლამაზმანი
გარდა იმისა, რომ ამ კონკურსის გამარჯვებულად დამასახელეს, მოვიპოვე დამატებითი ნომინაციებიც


სამოდელო სააგენტო "ატრინის" მოდელი მერი ტარიელაშვილი ახლახან თურქეთში გამართულ სილამაზის კონკურსიდან გამარჯვებული დაბრუნა. ის "მის ევრაზია" გახდა. ამ ტიტულთან ერთად, ის კიდევ 4 ნომინაციაში დაასახელეს.


- თბილისში დავიბადე და გავიზარდე. დედა ეროვნებით ოსია, მამა - ქართველი. დედა ძალიან პატარა - 15 წლის გათხოვდა, 16 წლისას უკვე მე ვყავდი, მალევე ჩემი ძმაც დაიბადა და სამწუხაროდ, მერე ჩემი მშობლები დაშორდნენ. მამასთან ურთიერთობა არ გვაქვს. სადმე რომ შემხვდეს, ალბათ ვერც ვიცნობ. დედა გვზრდიდა და ერთდროულად 2 ადგილას მუშაობდა. ჩემთვის არასოდეს შეუმოწმებია გაკვეთილები... არც არავინ მთხოვდა, მაგრამ პატარაობიდანვე საკუთარ თავს შთავაგონე, რომ აუცილებლად კარგად უნდა მესწავლა. ფრანგული ენის მასწავლებელს დღემდე მაგალითად მოჰყავს ფაქტი, რომ არ მქონდა წიგნები, მაგრამ ყოველთვის ვახერხებდი გაკვეთილების მომზადებას. დედა ჩემთვის გმირია, მან იმდენი შეძლო, რომ ორივე შვილს უმაღლესი განათლების მიღებაში დაგვეხმარა. მახსოვს აბიტურიენტობის ურთულესი პერიოდი. მაშინ მეუბნებოდნენ, რომ სახელმწიფო გრანტის მიღება შეუძლებელი იყო, მხოლოდ ნაცნობობით ხდებოდა და ა.შ. მაგრამ მე მაინც ვცდილობდი, ბევრს ვმეცადინეობდი და შევძელი კიდეც თბილისის სახელმწიფო უნივერსიტეტში 100%-იანი დაფინანსებით სწავლა.

- მოდელობა რა ასაკიდან დაიწყე?

- როგორც ბევრი პატარა გოგო, მეც ბავშვობიდან ვოცნებობდი მოდელობაზე. დედა სახლიდან რომ მიდიოდა, დაქალებთან ერთად ჩვენებებსა და კონცერტებს ვაწყობდი, ვიზომავდით დედას კაბებს, მაღალქუსლიან ფეხსაცმელს, ვითხიპნებოდით ტუჩსაცხით... ამ მოგონების შთაგონებით, გადავწყვიტე, მზრუნ­ველობა მოკლებულ ბავშვთა სახლს ვესტუმრო, გავახარო და გავახალისო პატარა პრინცესები. მე მათ ვეტყვი, რომ თუ ძალიან მოინდომებენ, აუცილებლად მიაღწევენ დასახულ მიზნებს.

- რამ შეცვალა შენი ცხოვრება?

- 3 წლის წინ, ბარბარობის ღამეს, გაზით მოვიწამლე და შემთხვევით გადავრჩი... ამ ფაქტის შემდეგ ბევრი რამ შევცვალე ჩემს ცხოვრებაში. პირველ რიგში, გამოვიცვალე ფაკულტეტი და პარალელურად, ვცადე ბედი სამოდელო სააგენტოში. მეუბნებოდნენ, რომ მოდის სფეროში, განსაკუთრებით კი მსოფლიო სილამაზის კონკურსში გამარჯვება წარმოუდგენელიაო. წელს კი "მის ევრაზია" გავხდი. ზოგჯერ მგონია, რომ დამესიზმრა, მაგრამ გვირგვინი და ნომინაციები ადგილზეა.

- გარდა იმისა, რომ სამოდელო საქმიანობას ეწევი, კიდევ რა პროფესია გაქვს?

- პროფესიით ფსიქოლოგი ვარ. ვთანამშრომლობ რამდენიმე კომპანიასთან ორგანიზაციული ფსიქოლოგიის მიმართულებით. მაქვს დასაქმების სააგენტოც და ძალიან მალე ვიწყებ პროექტს, რომლის საშუალებითაც დავეხმარები ახალგაზრდებს, რომ სწორად შეარჩიონ პროფესია.

- მოგვიყევი სილამაზის კონკურ­სზე, რომელშიც მონაწილეობდი...

- კონკურსი ჯერ საქართველოში ჩატარდა, შემდეგ კი მსოფლიო ფინალი - თურქეთში გაიმართა. ჩემთვის ეს პირველი მასშტაბური კონკურსი იყო. სიმართლე გითხრათ, გამარჯვების იმედი არ მქონდა. ვფიქრობდი, იქნებ რაიმე ნომინაციაში მაინც დავესახელებინეთ. 1 კვირის განმავლობაში, დილის 7-დან ღამის 2 საათამდე დატვირთული რეჟიმით ვმუშაობდი საკუთარ თავზე. გადაღებები, რეპეტიციები, ჩვენებები და სხვადასხვა აქტივობა გვქონდა. ჩვენებებზე სიცხიანი გამოვდიოდი. მიჭირდა, მაგრამ მაინც ფეხზე ვიდექი და ვიღიმოდი. გარდა იმისა, რომ ამ კონკურსის გამარჯვებულად დამასახელეს, მოვიპოვე დამატებითი ნომინაციებიც: "მის სრულყოფილება", "მის ქემერი", "მის სოციალური მედია". ყოველ ორ წუთში ჩემი სახელი და გვარი ისმოდა. სხვებს აღარაფერი დავუტოვე (იცინის). ფინალში ოცი ულამაზესი გოგონა დავრჩით და გამარჯვებას ნამდვილად არ ველოდი. უკრაინიდან და ლიტვიდან ისეთი ლამაზმანები იყვნენ, რომ თავადაც მათ ვგულშემატკივრობდი. კონკურსი ქალაქ ქემერში ჩატარდა და ამ ქალაქის მერს ძალიან მოვეწონე. კონკურსი ჩემი დაბადების დღეს დაემთხვა და უამრავი საჩუქარი მივიღე. მერმა უზარმაზარი ტორტი გამომიგზავნა, ჩემი ფოტოთი. არაერთი შემოთავაზება მივიღე სხვადასხვა ქვეყნიდან.

- ვინ არის შენი ყველაზე დიდი გულშემატკივარი? ვინ გეხმარება ცხოვრებისეული სირთულეების გადალახვაში?

- ჩემი დედიკო და დეიდები. დედა ჯერ ძალიან ახალგაზრდაა და ყველაფერში მხარში მიდგას. თავიდან არ უნდოდა, მოდელი ვყოფილიყავი, მაგრამ ახლა უკვე კმაყოფილია ჩემი გადაწყვეტილებით, ხედავს ჩემს მიღწევებს და იმასაც, თუ როგორ მახარებს და მაბედნიერებს ეს საქმე. უხარია ჩემი წარმატებები!

- ალბათ, უამრავი თაყვანისმცემელი გყავს. როგორ გამოხატავენ ისინი შენდამი სიმპათიას?

- დიახ, ბოლო დროს თაყვანისმცემლების რაოდენობა გაიზარდა. ქუჩაში უკვე ბევრი ადამიანი მცნობს, სოციალურ ქსელებშიც ჩემს გამარჯვებას კარგი გამოხმაურება მოჰყვა. ჩემთვის უცნობი ადამიანები აზიარებდნენ ჩემს ფოტოებს, სტატიებს, რაც ძალიან ბედნიერს მხდის.

- თავად როგორი მამაკაცები მოგწონს? რა შეიძლება დათმო სიყვარულის გამო?

- მომწონს რეალიზებული და კარგად აღზრდილი მამაკაცები, რომლებიც თავიანთი საქმით არიან დაკავებულები, ისახავენ მიზნებს და წარმატებით აღწევენ კიდეც მათ. მომწონს თავაზიანი, ემოციურად სტაბილური მამაკაცები, რომლებიც პატივს სცემენ დროს, საკუთარ თავს და ადამიანებს. არ ვიცი, სიყვარულის გამო შეიძლება თუ არა რამე დავთმო, ახლა კი არაფრის დათმობა არ მინდა! შეიძლება, იმიტომ, რომ არავინ მიყვარს.

- როგორი მამაკაცი წარმოგიდგენია შენ გვერდით?

- მიზანდასახული ვარ. არას­დროს ვნებდები. რაც მინდა, იმას ყოველთვის ვაღწევ. გვერდით ვერ ავიტან მამაკაცს, რომელიც სულ წუწუნებს და თავის წარუმატებლობას სხვებს აბრალებს. მამაკაცი, რომელიც ჩემ გვერდით იქნება, ძალიან ძლიერი და წარმატებული უნდა იყოს. ვაფასებ ისეთ ადამიანებს, რომლებიც ნულიდან იწყებენ ყველაფერს და მიზნის მისაღწევად უკან არ იხევენ. ამასთან, ძალიან რომანტიკული, მზრუნველი და ყურადღებიანი უნდა იყოს და უზომოდ ვუყვარდე.

- რთულია შენი გულის მოგება...

- ყოველ შემთხვევაში, იოლი ნამდვილად არ არის (იღიმის). განწყობის საკითხია, ერთი ადამიანის ნათქვამმა თუნდაც, ერთმა სიტყვამ შეიძლება გამაბედნიეროს და სხვა ადამიანის მოძღვნილი მთელი პოემა გულთან ახლოს ოდნავადაც ვერ მოვიდეს.

- შენმა რჩეულმა საყვარელი საქმიანობა რომ აგიკრძალოს, რას იზამ?

- ცხოვრებაში ყველას აქვს თავისი როლი და ადგილი. არ იქნება სწორი, რომ მთხოვოს საქმისთვის თავის დანებება.

- რამდენჯერ გყვარებია?

- ჩემთვის სიყვარული არის ერთხელ და სამუდამოდ! ვფიქრობ, ჯერ არ მწვევია ნამდვილი სიყვარული. იყო დრო, როცა მეგონა, ვიპოვე ის ერთადერთი, მაგრამ სამწუხაროდ, შევცდი და წელს, 3-წლიანი ურთიერთობის შემდეგ დავშორდით. ამის გამო დღეს ძალიან მიჭირს გადაწყვეტილების მიღება, მშობლების მაგალითის კვალობაზეც, ურთიერთობისადმი ჩემი შეხედულება ცოტა არ იყოს სკეპტიკურია. პროფესიიდან გამომდინარეც, როდესაც ვინმე მელაპარაკება, მის მოტივს ვხვდები. ალბათ, ძალიან გულწრფელი უნდა იყოს, რომ დავიჯერო.

- ...და რა იყო დაშორების მი­ზეზი?

- მნიშვნელოვანი არაფერი მომხდარა. უბრალოდ, ურთიერთობას არ ჰქონდა მომავალი, არ ვითარდებოდა და შეწყდა.

- რას აკეთებ იმისთვის, რომ მუდმივად ფორმაში იყო?

- ძალიან მიყვარს გემრიელი საჭმელები, თვითონაც ხშირად ვამზადებ. მიყვარს სამზარეულოში ფუსფუსი. მიხარია, რომ ეს ჩემს წონაზე არ აისახება, არ მეტყობა... თუმცა, გენეტიკის მადლობელი ვარ. მაინც ვფიქრობ, რომ მოდელისთვის აუცილებელია ჯანსაღი ცხოვრების წესის დაცვა, სწორი კვება და ვარჯიში.

- რას ამზადებ ყველზე გემრიელს?

- ტოლმას, ყველანაირ წვნიანს, სალათებს. ყველას მოსწონს, ვინც მიირთმევს. მე კიდევ მიხარია და ვცდილობ, კიდევ უფრო გემრიელი რაღაცების მომზადება ვისწავლო.

- ხშირად ვარჯიშობ?

- დიახ, ვარჯიშის გარეშე სასურველ ფორმაში ყოფნა წარმოუდგენელია. მთავარი სურვილი და მონდომებაა, რომ ვარჯიში ცხოვრების წესად ვაქციოთ.

სოფო ჭონიშვილი
ბეჭდვაელფოსტა
კომენტარები (2)
20.12.2017
ბევრი მორელისაგან განსხვავებით მართლა მშვენიერი გოგოა,მე ძალიან მომწონს და გულითაც ვულოცავ გამარჯვებას.რაც მთავარია სილამაზესთან ერთად ჭკვიანიც ჩანს,განათლებულიც და დამოუკიდებელი აზროვნებისაც.ასე რომ წარმატებულ კარიერას და დიდ პირად ბედნიერებას გისურვებ,მერი. პ.ს.ამისთანა გოგო რომ გათხოვდება,ვიღაცა ხელმეორედ დაწერს ალბათ "მერის".
სოსო
19.12.2017
სიკეთე და გამარჯვება არ მოგიშალოს უფალმა.
ჩოგანა გორელი
ამ კატეგორიის სხვა სიახლეები
ენერგიული თამარ მაყაშვილი შვილებზე, შვილიშვილებსა და მეუღლეზე
ნინი შერმადინისა და ეკა მგალობლიშვილის გულახდილი ინტერვიუ
როგორ უნდა იყოს ქალი მუდმივად ძლიერი და საინტერესო
"ქალური შური ხანდახან მძაფრად მიგრძნია"
ვისზე იყვნენ შეყვარებული ცნობილი ქართველი მამაკაცები
კვირის სიახლეები
"გმირია ქალი, რომელიც საცხოვრებლად მთაში წავიდა"
"ყველა ერთმანეთს მტრობს, ჭორავს - იშვიათად გაიგებ ტკბილ სიტყვას"
0 კომენტარი
ლაშა შუშანაშვილს საბერძნეთი საფრანგეთს გადასცემს - ქართველი "კანონიერი ქურდების" "შავი დღე" ევროპაში
საერთაშორისო სააგენტო Associated Press-ის ინფორმაციით, საბერძნეთის ხელისუფლებამ მიიღო გადაწყვეტილება, განახორციელოს ცნობილი ქართველი ავტორიტეტის ლაშა შუშანაშვილის საფრანგეთში ექსტრადიცია.
0 კომენტარი
"მწყემსმა თავად აჩვენა მაშველებს ის ადგილი, სადაც ბავშვის ცხედარი ჰქონდა გადამალული" - ვინ არის ხადას ხეობაში მოკლული ამერიკელი ცოლ-ქმარი
6 ივლისს მარნეულის მუნიციპალიტეტში მცხოვრები ამერიკელი ცოლ-ქმარი რაიან და ლორა სმიტები, 4 წლის ვაჟთან ერთად, დუშეთის რაიონის ხადას ხეობაში გაუჩინარდნენ.
0 კომენტარი
"მკვლელმა ლუკას დანა რამდენჯერმე დაარტყა და გაიქცა" - მესტიაში მომხდარი მკვლელობის დეტალები
მესტიაში ურთიერთშელაპარაკების შემდეგად 25 წლის ლუკა ფალიანი მოკლეს.
0 კომენტარი
"12 წლის ბიჭების ცხედრები წყალში ხელჩაჭიდებული იპოვეს"
SOS - ბოლო ორ თვეში 27 ადამიანი დაიხრჩო
2 კომენტარი
"ბრუტუსი, ანუ იულიუს კეისრის მკვლელობა" ახმეტელის თეატრში
"რამდენიმეწლიანმა კვლევამ მიჩვენა, რომ ის მოღალატე არ არის"
0 კომენტარი
ფულის შოვნის "თანამედროვე მეთოდები"
უმუშევრობის ფონზე ყველა თავისებურად ცდილობს ფულის შოვნასა და თავის გატანას, - გზები მრავალფეროვანია, გააჩნია, ვის როგორი ფანტაზია აქვს.
1 კომენტარი
სახსრებში მამტვრევს. ალბათ ბედნიერების ნიშანია.
LIFE
თანამედროვე მზევინარი და მთაში ნაპოვნი სილაღე...
რა პრობლემებს აწყდებიან რეგიონში ტურისტებთან ურთიერთობისას
0 კომენტარი
"ბრუტუსი, ანუ იულიუს კეისრის მკვლელობა" ახმეტელის თეატრში
"რამდენიმეწლიანმა კვლევამ მიჩვენა, რომ ის მოღალატე არ არის"
0 კომენტარი
ბავშვებად დარჩენილი მსახიობები
1946 წელს ქუთაისელმა ბავშვებმა დაუვიწყარი საჩუქარი მიიღეს - გაიხსნა თოჯინების თეატრი ღვინის ყოფილ სარდაფში.
0 კომენტარი
ნატუკა გულისაშვილის პროტესტი
"მეუბნებიან ხოლმე, მანქანას კაცივით ატარებო"
0 კომენტარი
"მამა "ჩარეცხილების" სიაშიც კი მოხვდა და პანთეონში მისი დაკრძალვა არც უფიქრიათ"
რამაზ ჩხიკვაძის შვილის გულახდილი ინტერვიუ
10 კომენტარი