ახალგორის რაიონი ქართული ენისა და პროდუქტის გარეშე...
მშობლები კი გააფრთხილეს, რომ ბავშვებთან ქართულად არ ელაპარაკათ. არადა, აქ, ამ რაიონში, უმეტესობა ქართველები ვართ და საკუთარ ენაზე გვიკრძალავენ ლაპარაკს. - ამბობს ახალგორში მცხოვრები 38 წლის ნინო.
ადგილობრივი მოსახლეობის თქმით, ბოლო რამდენიმე დღეა ე.წ. განათლების სამინისტროს წარმომადგენლები მკაცრად აკონტროლებენ სკოლებსა და ბაღებს...
ოკუპირებული ახალგორის რაიონში ახალი სასწავლო წელი ისედაც ქართული ენის აკრძალვით დაიწყო და კონტროლი ყოველდღიურად მკაცრდება.
ნინო, ახალგორის მკვიდრი:
- დაივიწყეთ ქართულიო, გვეუბნებიან, არადა, როგორ? რუსული აქ ძალიან ცოტამ იცის, ოსური მარტო ჩვენ კი არა, თავადაც არ იციან... რამდენიმე დღის წინ სკოლაში შევიდნენ და რვეულები შეუმოწმეს ბავშვებს, მინაწერები ხომ არ ჰქონდათ ქართულად. ასევე მასწავლებლებსაც ჟურნალები შეუმოწმეს. ყველა შეშფოთებულია ამ "ახალი სტანდარტებით". რაიონის საბავშვო ბაღის თანამშრომლებს როგორც ერთმანეთთან, ასევე ბავშვებთან ქართულად საუბარი აუკრძალეს. ახალი საბავშვო ბაღის გახსნას, რომელიც ძირითადად, აქ მყოფი რუსი სამხედროების შვილებით არის დაკომპლექტებული, "პრეზიდენტი" ანატოლი ბიბილოვი ესწრებოდა და ყურადღების ცენტრშია. მას იქ დირექტორად თავისი ნდობით აღჭურვილი პირი, ალა გუსოევა ჰყავს, რომელიც წარმოშობით წინაგარიდანაა, ცხინვალის ე.წ. უნივერსიტეტდამთავრებულს, პედაგოგიური განათლება არა აქვს, თუმცა, მკაცრი, მომთხოვნია და მჭიდროდაა დაკავშირებული "ხელისუფლების" წარმომადგენელ მურად ჯიოევთან.
მან თანამდებობაზე დანიშვნისთანავე აუკრძალა ბაღის პერსონალს ქართულად საუბარი. იყო შემთხვევები, როდესაც "ფაქტზე წაასწრო" ბაღის აღმზრდელსა და ძიძას და გააფრთხილა, მსგავსი რამ თუ კიდევ ერთხელ განმეორდებოდა, სამსახურს დატოვებდა... მოგვიანებით, მისივე ინიციატივით, ერთ-ერთი მათგანი ყოველგვარი ახსნა-განმარტების გარეშე სამსახურიდან გაათავისუფლა...
ხათუნა, ახალგორის მცხოვრები: 
- საბავშვო ბაღში, როგორც ქართველი, ასევე ოსი ბავშვები არიან და თითქმის ვერავინ ლაპარაკობს ე.წ. სახელმწიფო ენაზე, რასაც ვერ ვიტყვით ქართულზე. მეტიც, ადგილობრივების თქმით, თამაშისას ოსი ბავშვები ქართულად იწყებენ ლაპარაკს... ასეთი შემთხვევისას ბაღის დირექტორი შენიშვნას აძლევს ბავშვის მშობლებს, რადგან ბავშვების ქართულად ალაპარაკება, იმას ნიშნავს, რომ მისი მშობლები სახლში ამ ენაზე ლაპარაკობენ... ასეთი აკრძალვა მიუღებელია ადგილობრივი ოსებისთვისაც, ამბობენ, რომ ქართულის აკრძალვით, ვითომ ეროვნული სულისკვეთებისა და მოტივაციის ამაღლება უნდათ, არადა, თავად პრეზიდენტი გადარჩენის გზას რუსეთთან შეერთებაში ხედავსო...
ახალგორელი ქართველების ცნობით, არის შემთხვევები, როდესაც მსგავსი აკრძალვების გამო ბავშვები პროტესტის ნიშნად ბაღსა და სკოლაში წასვლაზე უარს ამბობენ.
ვერა, ახალგორის მკვიდრი: - მშობლები დარწმუნებული არიან, რომ ბაღის დირექტორს ბაღის თანამშრომლებს შორის დამსმენი ჰყავს, რომელსაც მასთან დღის განმავლობაში მომხდარ მსგავს ფაქტებზე ინფორმაცია მიაქვს... ყოველდღე ახალ-ახალ შეზღუდვებს აწესებენ, ათი წელია, ახალგორის რაიონზე ქართული იურისდიქცია არ ვრცელდება, მაგრამ ასეთი რამ - ქართული ენის აკრძალვა აზრად არავის მოსვლია, არ სმენიათ, რომ ადამიანებს თავიანთ ენაზე საუბარს უკრძალავდნენ... ახალგორის რაიონის სკოლებშიც, ე.წ. განათლების მინისტრმა "ოფიციალურად" მოითხოვა მასწავლებლებისგან, რომ სასწავლო პროცესის დროს, მოსწავლეებთან მხოლოდ რუსულ და ოსურ ენებზე ესაუბრათ... ბიბილოვის მოსვლის შემდეგ ძალიან ბევრი შეზღუდვა და აკრძალვა დაწესდა. იქამდე, ოსური მედიის ცნობით, წლების განმავლობაში ოსი "მაღალჩინოსნები" ადგილობრივ მოსახლეობას ქართულად ესაუბრებოდნენ. ჩვენ გვახსოვს, ომის შემდეგ ედუარდ კოკოითი შეხვდა ადგილობრივ მოსახლეობას და უთხრა, - ფაშისტები კი არ ვართ, თქვენი ენა და ეროვნება წაგართვათ, პირიქით, ყოველთვის ვეცდებით, დაგიცვათო... მაშინ და ახლაც, "ხელმძღვანელ პოზიციებზე" მყოფებიდან ყველამ იცოდა და იცის ქართული, თუმცა ბოლო ხანებში მათ დემონსტრაციულად თქვეს უარი ჩვენს ენაზე საუბარზე და არც ადგილობრივების ლაპარაკზე რეაგირებენ, თითქოს არ ესმით... ეს ინიციატივა პრობლემებს უქმნის იმ კატეგორიასაც, ვინც ოსური ენა არ იცის...
ცხინვალის მკვიდრი, ოსი, მარიანა თაზიევა, სოციალურ ქსელში წერს, რომ ყველანაირი აკრძალვა მიუღებელია.
- სასაცილოა ეს უბადრუკი აკრძალვები, სატირალი რომ არ იყოს... გეტოში ვცხოვრობთ თუ რაშია საქმე?! რა სისულელეა ენის აკრძალვა მაშინ, როდესაც თავად რუსულად ლაპარაკობენ? რომელმა მაღალჩინოსანმა იცის ოსური გამართულად? დარწმუნებული ვარ, არც ერთმა. ეს აკრძალვები ფაშისტური გერმანიის მეთოდებს ჰგავს.
ახალგორელი აქტივისტის, თამარ მეარაყიშვილის თქმით, რამდენიმე დღეა, ახალგორის რაიონში ქართულ პროდუქტებზე შეზღუდვებს აწესებენ... როგორც ადგილობრივი გარემოვაჭრეები ამბობენ, ბოლო რამდენიმე დღეა ე.წ. სანეპიდსადგურის თანამშრომლები შემოწმებაზე დადიან და სხვადასხვა მიზეზით, რამდენიმე მაღაზიაში ქართული წარმოების პროდუქტის ამოღებას ითხოვენ...
აკრძალულ პროდუქტთა სიაში მოხვდა თევზი და ხორცპროდუქტები, ძეხვეული, გაყინული ქათამი და ნახევარფაბრიკატები... ამ აკრძალვამ, როგორც ადგილობრივი ქართველების, ისე ოსების აღშფოთება გამოიწვია, რადგან როგორც ე.წ. სამხრეთ ოსეთის ხელმძღვანელობა განმარტავს, - მიზეზი ძალზე არასერიოზულია, ქართული მხარიდან მათი ტრანსპორტირებისას, აზიური ფაროსანას გავრცელების საფრთხე...
ეკა, ახალგორის მკვიდრი: - ომამდეც და შემდეგაც, ქართული მხარიდან ბოსტნეულით დატვირთული მიკროავტობუსები ცხინვალის მიმართულებით უწყვეტად მოედინებიან და აქამდე არასდროს არავის დაუკავებია... ახალი მიზეზი იპოვეს, - ყველანაირი პროდუქცია სანეპიდსადგურის შემოწმებას უნდა დაექვემდებაროსო... რამდენიმე დღეა, ახალგორის მაღაზიებიდან ქართული პროდუქტი გაქრა. მოვაჭრეებს ჯარიმებით ემუქრებიან და ისინიც, გართულებების თავიდან ასაცილებლად, პროდუქტს მალავენ ან ძალიან საიმედო კლიენტებზე, დახლს ქვემოდან ყიდიან ისე, როგორც საბჭოთა კავშირის დროს იმპორტულ საქონელზე ხდებოდა, ანუ იმ წლებში ვბრუნდებით... რაიონში ქართული პროდუქციის აკრძალვა სოციალურ ფონს კიდევ უფრო გაამწვავებს, რადგან რუსეთიდან ნებისმიერი სახის ტვირთის შემოტანა უფრო ძვირი უჯდებათ, შესაბამისად, მისი რეალიზაციაც უფრო მაღალ ფასში მოუწევთ, რაც პრაქტიკულად, შეუძლებელია...
მოსახლეობას მეტის გადახდის საშუალება არა აქვს... მოვაჭრეები და მაღაზიის მფლობელები ისედაც პენსიიდან პენსიამდე ან ხელფასამდე დაგროვილ ვალებზე მუშაობენ. მოსახლეობას თვის ბოლომდე, სასიცოცხლო მნიშვნელობის მქონე პროდუქტებში - პურში, შაქარსა და მარილში იმდენი ვალი უგროვდებათ, რომ მთელ თანხას იქ ტოვებენ და ახალი ვალების აღებას მომდევნო დღიდან იწყებენ. ასეა ცხინვალში, ახალგორსა და მიმდებარე სოფლებში... ასეთ პირობებში, იმის ნაცვლად, რომ რაღაც შეღავათები დაწესდეს, ადამიანებმა ამოისუნთქონ და მხოლოდ გადარჩენაზე არ იფიქრონ, ყოველდღე უარესს აკეთებენ.
ლალი პაპასკირი