"რა კარგია, როგორ გახდი!.."
სახელი, გვარი: გიორგი ორბელაძე.
ასაკი: 28 წლის.
პროფესია: ფინანსისტი.
ამჟამინდელი საქმიანობა: არის ფიტნესკლუბის ფილიალების მენეჯერი (ფიტნესის მიმართულებით) და პერსონალური მწვრთნელი. ასევე, მონაწილეობს სერიალში - "ჩემი ცოლის დაქალები".
ჰობი: რაგბი.
- ახალი წლის დღესასწაულს სპორტდარბაზში შეხვედრიხარ?
- არა.
- უცნაურ სიტუაციაში?
- მაგალითად, კლიპის გადასაღებ მოედანზე.
- ბოლოს ვინ და რის გამო შეგაქო?
- ჩემი სპორტული მიღწევების გამო უცხო ადამიანმა შემაქო.
- როცა გოგონა გეფლირტავება, როგორ იქცევი?
- ძირითადად, ვერ ვხვდები ხოლმე.
- და როცა ხვდები?
- უკვე ვცდილობ მივახვედრო, რომ ფლირტითვე ვერ ვუპასუხებ, რადგან დაქორწინებული ვარ.
- პირველი ავტოგრაფი...
- არ მახსოვს. ეს დიდი ხნის წინ იყო... ძირითადად, ფოტოების გადაღებას მთხოვენ.
- კარგი მსახიობი ხარ?
- ვფიქრობ, რომ მსახიობი საერთოდ არ ვარ.
- სერიალ "ჩემი ცოლის დაქალებში" შენ მიერ შესრულებულ როლს როგორ აფასებ?
- თავდაპირველად მუშაობა გამიჭირდა, მაგრამ სერიიდან სერიამდე მივხვდი, რა როგორ გამეკეთებინა და შეცდომები გამოვასწორე.
- შენს პერსონაჟთან რა საერთო და განმასხვავებელი თვისებები გაქვს? - ერთადერთი საერთო ის მაქვს, რომ ორივე ფიტნესის სფეროში ვმუშაობთ. ეს პერსონაჟი სტერეოტიპულად არის "აღებული" - კუნთმაგარი და ცოტათი გონებაჩლუნგი. ვარჯიშის, სწორი კვების, ცხოვრების ჯანსაღი წესის მიღმა არაფერი იცის და არც აინტერესებს. ასეთი აზროვნებისგან ნამდვილად "შორს ვარ", მიუხედავად იმისა, რომ ჯანსაღი ცხოვრება ჩემი სტილია - მივყვები და პროპაგანდას ვუწევ. ისე არ ვარ, რომ მხოლოდ ვარჯიში მაინტერესებდეს. თან, ფიტნესინსტრუქტორობა ჩემი მეორე პროფესიაა. ცხოვრებაში ბევრი სხვა ინტერესი მაქვს.
- სერიალში ასეთი როლის გამო პროტესტის გრძნობა არ გაგიჩნდა?
- არანაირად, რადგან იშვიათად ხდება, რომ ვინმემ საკუთარი თავის თამაში შემოგთავაზოს.
- შენი საახალწლო სუფრაც ჯანსაღი კვების პრინციპითაა მომზადებული?
- არა. ტრადიციული ქართული სუფრა მიყვარს. შესაბამისად, არა მხოლოდ ახალი წლის დღესასწაულზე, არამედ ყოველდღიურადაც ქართულ კერძებს ხშირად მივირთმევ.
- რეალურად, ჰიტ ლეჯერის მიერ განსახიერებული ჯოკერი უფრო მეტად მოგწონს თუ ხოაკინ ფენიქსის?
- ხოაკინ ფენიქსის. საერთოდ, თუ გაინტერესებთ, ჩემთვის ჯოკერი არის ჯეკ ნიკოლსონი. მას ყველაზე მაგარ მსახიობად მივიჩნევ და არც ერთს არ შევადარებ, თუმცა თავად ფილმი - "ჯოკერი" ბოლოს ბევრად სერიოზული ნამუშევარი გამოვიდა. ამიტომ კამათობენ - ჰიტ ლეჯერი ჯობს თუ ხოაკინ ფენიქსი.
- შენი მიღწევებიდან ყველაზე მეტად, რითი ამაყობ?
- შარშან, 10 ნოემბერს საერთაშორისო შეჯიბრებაზე - "მისტერ ოლიმპია" მეორე ადგილი დავიკავე - ვერცხლის მედალი ავიღე.
- ცნობილი კომიქსების ეკრანიზაციებიდან რომელი სუპერგმირის როლს ითამაშებდი?
- ბეტმენის, სუპერმენის, ლოგანის... ალბათ, გარეგნულად ეს გმირები უფრო შემეფერება.
- რაიმე უცნაური კომპლიმენტი მიგიღია?
- კი. მაგალითად, "რა კარგია, როგორ გახდი!.." ზედმეტ წონას არასოდეს შევუწუხებივარ, გასახდომი არ ვყოფილვარ.
- თოვლის ბაბუის არსებობის რომელ ასაკამდე გჯეროდა?
- თუ მჯეროდა, არ მახსოვს. ალბათ, ეს ისეთ ადრეულ ასაკში იყო, რომ მეხსიერებაში არ შემომრჩა... მცირე ასაკიდან "თოვლის ბაბუისგან" საჩუქრებს ვიღებდი, მაგრამ ყოველთვის ვიცოდი, რომ ყველაფერი მშობლებს მოჰქონდათ - ვერ მატყუებდნენ.
- როგორ ფიქრობ, სამყაროსთვის რა სარგებლობის მოტანა შეგიძლია?
- ვფიქრობ, ჩემი მუშაობით (ფიტნესის სფეროს ვგულისხმობ) ბევრ ადამიანს სარგებელი უკვე მოვუტანე - მათი ცხოვრება უკეთესობისკენ შევცვალე, არაჯანსაღიდან ჯანსაღი ცხოვრებისკენ "მოვაქციე" და ამას ვაგრძელებ.
- დაასახელე ახალ წელს ჩაფიქრებული სურვილი, რომელიც აგიხდა...
- საერთოდ, ახალი წლის დღესასწაულზე ან დაბადების დღეზე სურვილების ჩაფიქრება არ მჩვევია. თუკი რაღაც სურვილი და მიზანი მაქვს, ვცდილობ, ამას შრომით მივაღწიო - სასწაულების არ მჯერა...
ეთო ყორღანაშვილი