ორი განსხვავებული ძმის ცხოვრება ზღვისპირეთში - "უღიმღამოდ ჩაცმული, ზღვის სანაპიროზე დადის და ცდილობს, ძვირფასეულობა იპოვოს" - გზაპრესი

მოკლემეტრაჟიანი ფილმი "გაბანა" საქართველოს კინომატოგრაფიის ეროვნული ცენტრის გამარჯვებული პროექტია. გადაღება უკვე დასრულდა და ახლა მისი მონტაჟი მიმდინარეობს. რეჟისორი და სცენარის ავტორი გიგა ბაინდურაშვილია. ფილმის მთავარი პერსონაჟები განსხვავებული ხასიათსა და ინტერესების ძმები არიან: ერთი სიტყვაძუნწი, თავის თავში ჩაკეტილი, უღიმღამოდ ჩაცმული, ზღვის სანაპიროზე მეტალოდეტექტორით დადის და ცდილობს, ძვირფასეულობა იპოვოს, გაყიდოს და ასე ირჩინოს თავი, მეორე კი ენერგიულია. 14 წელი საზღვარგარეთ ცხოვრობდა, ახლა მშობლიურ კუთხეში ბრუნდება და უმცროსი ძმის ცხოვრებას რადიკალურად ცვლის. ძმების როლებს ჯანო იზორია და დათო როინიშვილი ასრულებენ. რაც შეეხება ფილმის სახელწოდებას - "გაბანა", ის მსოფლიოში ცნობილი იტალიური მოდის სახლს, "დოლჩე და გაბანას" უკავშირდება.

დათო როინიშვილი:

- მსახიობისთვის მნიშვნელოვანია სცენარი, ისევე, როგორც რეჟისორი და გადამღები ჯგუფი, ვისთანაც მუშაობა მოგიწევს. სცენარი თავიდანვე მომეწონა. გამიხარდა, რომ ისეთი ნიჭიერი ადამიანის გვერდით მომიწევდა თამაში, როგორიც ჯანო იზორიაა. აქამდე ერთად ფილმზე არ გვიმუშავია. გადასაღებ მოედანზე შემოქმედებითი ატმოსფერო სუფევდა და ვფიქრობ, ჩვენი პერსონაჟებიც არ გამოვიდა ცუდი. მათში ბევრი მტკივნეული დეტალია, რომელიც არა მგონია, მაყურებელს გამორჩეს. ფილმში სოციალური თემატიკის ფონზე, ორი განსხვავებული ხასიათის ძმის ცხოვრებაა ასახული. ორივე შეუმდგარი ტიპია, მაგრამ მაინც აქვთ იმედი, რომ ერთ დღესაც ყველაფერი შეიცვლება. მათ უყვართ თავიანთი ქვეყანა, ოჯახი, ერთმანეთი, მაგრამ ერთ-ერთი ძმა ანუ ჩემი პერსონაჟი ისევ ევროპისკენ გარბის, რადგან ამ გზით ცხოვრების უკეთესობისკენ შეცვლა სურს. სამწუხაროდ, გარშემო ბევრი ასეთი ადამიანია.

- საზღვარგარეთ გამგზავრებაზე თუ გიფიქრია?

- ამაზე რამდენჯერმე მიფიქრია. ჩემი რამდენიმე მეგობარი მსახიობი წავიდა და ახლაც საზღვარგარეთ ცხოვრობს. ნაწილმა სოციალური პრობლემები მეტ-ნაკლებად მოიგვარა, მაგრამ შინაგანად მაინც დათრგუნვილები არიან. რომ წავსულიყავი, ალბათ მეც დავითრგუნებოდი. ძნელია, როცა აცნობიერებ, რომ საუკეთესო წლები დაკარგე ოჯახის წევრებისა და სამშობლოსგან შორს.

- ნოემბერში ზაფხულის სცენის თამაშმა მოგიწიათ...

- დიახ, ასეა. კარგი იქნება, თუ ზაფხულის პროექტს, წელიწადის ამავე სეზონზე დააფინანსებენ და ზამთრისას - ზამთარში. ფილტვების ანთება მქონდა და ისე ვთამაშობდი. მთელი გადამღები ჯგუფი ნემსებითა და წამლებით დამდევდა. მათი მადლიერი ვარ. რას ვიზამთ, კინო, თეატრი მსხვერპლს ითხოვს (იღიმის). ახლა შედარებით უკეთ ვარ და ველოდები პრემიერას, რომელიც მალე გაიმართება.

ჯანო იზორია:

- ფოთის თეატრიდან გასტროლი გვქონდა, საერთაშორისო ფესტივალზე ვიყავი, როცა მომწერეს ამ ფილმის გადაღებების შესახებ და მითხრეს, რომ ერთ-ერთ მთავარი გმირის შემსრულებლად მოვიაზრებოდი. თბილისში გიგა ბაინდურაშვილს შევხვდი. მას და გიორგი ქობალიას რამდენიმე წელია, ვიცნობ და მომწონს მათი ხედვა. სულ ვფიქრობდი, რომ სიამოვნებით ვიმუშავებდი ამ ჯგუფთან. გამიხარდა, როცა გავიგე, რომ ჩემი ძმის როლს ქუთაისის თეატრის მსახიობი, დათო როინიშვილი შეასრულებდა. რვა დღით გავემგზავრეთ ქობულეთში. ეს იყო არაჩვეულებრივი დღეები, თავისი ურთიერთობებითა და ადამიანური დამოკიდებულებით. საოცრად მობილიზებული ჯგუფია, პროფესიონალებით დაკომპლექტებული.

გიგა ბაინდურაშვილი, რეჟისორი:

- ერთი წელია, ფილმის იდეა თავში მიტრიალებს. ის მაშინ გამიჩნდა, როცა ერთ საღამოს, სანაპიროზე ყოფნისას გამოჩნდა ადამიანი, რომელიც ზღვის ნაპირს მოუყვებოდა მეტალოდეტექტორით და ხურდებს, სამკაულს, ნივთებს აგროვებდა. დავინტერესდი და მითხრეს, რომ ასეთები ბევრნი არიან და ამით ირჩენენ თავს... გადაღების ლოკაციად ქობულეთი ავირჩიეთ, რადგან ეს არ არის ინდუსტრიული ადგილი, უფრო მეტად ჩაკეტილი სივრცეა თავის სოციალური პრობლემებითა და ყოფითი მდგომარეობით. ამ ისტორიაში ჩნდება უფროსი ძმა, თავქარიანი ადამიანი, რომელიც უმცროს ძმას სტაბილურ ცხოვრებას ურევს.

- სწორედ ის მისცემს ძმას ჭრელ "გაბანას" პერანგს, ხომ ასეა?

- დიახ, "გაბანას" ჭრელი პერანგი არის ერთგვარი თავისუფლებისა და მისკენ სწრაფვის სიმბოლო. ასე ჩაცმა მიუღებელია ჯანო იზორიას პერსონაჟისთვის, რადგან ის ყოველთვის გრაფიკულ ფერებში იმოსება. ჩაიცვამს თუ არა ამ პერანგს, ეს უკვე ფინალში ჩანს. რეალურად, უფროსი ძმაც არარეალიზებული ადამიანია: საბერძნეთში ცხოვრობდა და კაცმა არ იცის, იქ რას აკეთებდა. პალმებიანი პერანგის გადაცემა მისთვის ერთგვარად, უმცროს ძმასთან კონტაქტში შესვლის ერთ-ერთი გზაა, რადგან ემიგრაციიდან დაბრუნებული მის სახლში აპირებს ცხოვრებას.

- ჯანო იზორია იმპულსური, ემოციური, ენერგიული ადამიანია, თუმცა შენს ფილმში მას განსხვავებული სახის შექმნა მოუხდა.

- ჯანო ფოთში ცხოვრობს. ზღვის სივრცე და ზღვისპირა ქალაქი მასთან ახლოა და ვიფიქრე, რომ ამ პერსონაჟს კარგად განსახიერებდა. სხვათა შორის, ძალიან დამეხმარა ცალკეული დეტალების გახსნაში. ფილმში ხაზგასმული არაა ამ კუთხის დამახასიათებელი დიალექტი და კილო, მაგრამ ჯანოს ზუსტად ის ხასიათი აღმოაჩნდა, რაც მე მჭირდებოდა.

- დათოზე რას გვეტყვი?

- მოგეხსენებათ, დათო ქუთაისის თეატრის მსახიობია და მასში არის ის დასავლური მუხტი, რაც ამ კუთხის წარმომადგენლებს ახასიათებთ. მაგალითად, თვალების სწრაფი და ცოცხალი მოძრაობა, რაც საერთო ჯამში, სწორედ იმ ვიზუალურ მხარეს ქმნის, რაც აქტიური და დამოუკიდებელი ხასიათის ადამიანს უნდა ჰქონდეს. აქვე აღვნიშნავ, რომ ჯანო და დათო ძალიან კარგი მსახიობები არიან და კმაყოფილი ვარ მათთან მუშაობით.

- ვაკო, რა გეგმები გაქვთ ამ ფილმთან დაკავშირებით?

ვაკო კირკიტაძე, ფილმის პროდიუსერი:

- ვინაიდან ფილმი მოკლემეტრაჟიანია, მისი კინოთეატრებში გაყიდვა გამორიცხულია, მაგრამ ჩვენება მაინც შედგება და ეს არ იქნება ფასიანი. ამ ფილმის საფესტივალო კარიერის სტრატეგია უკვე შემუშავებული გვაქვს: დეკემბერში ფილმი დასრულებული იქნება, თბილისში საპრემიერო ჩვენება გვექნება და იანვრის ბოლოდან ეტაპობრივად დავიწყებთ "გაბანას" გაგზავნას საერთაშორისო კინოფესტივალებზე.

ანა კალანდაძე