ვინ არის იდეალური ქალი ქართველი მამაკაცებისთვის? - გზაპრესი

ვინ არის იდეალური ქალი ქართველი მამაკაცებისთვის?

ვინ არის თქვენთვის იდეალური ქალი? - ამ შეკითხვაზე ერთგვაროვანი პასუხი არ არსებობს, რადგან სილამაზის აღქმა ყველასათვის განსხვავებულია. ვიღაც ფიქრობს, რომ იდეალურ ქალს ანჯელინა ჯოლის გარეგნობა, მარგარეტ ტეთჩერის ჭკუა და ჯოკონდას ღიმილი უნდა ჰქონდეს, ვიღაცისთვის კი, იდეალი საკუთარი დედა ან მეუღლეა. ჩვენ ეს კითხვა სხვადასხვა ასაკის, გემოვნებისა და პროფესიის ქართველ მამაკაცებს დავუსვით. მათმა პასუხებმა კიდევ ერთხელ დაგვარწმუნა, რომ გემოვნებაზე არ დაობენ:

რამაზ საყვარელიძე, პოლიტოლოგი:

- პირდაპირ გეტყვით, რომ ჩემი მეუღლე ჩემთვის ქალის იდეალია. ქალის გარეგნობას დიდი მნიშვნელობა აქვს, რადგან თავდაპირველად სწორედ გარეგნობას აქცევ ყურადღებას, მერე კი - მის ხასიათს და თვისებებს. თუ ერთნაირი გემოვნება, მოვლენებისადმი ერთნაირი დამოკიდებულებაც გაქვთ, ეს უკვე მტკიცე ოჯახის შექმნის საფუძველი ხდება. ლამაზ ქალს ამქვეყნად რა გამოლევს, მაგრამ ხმას რომ ამოიღებს და მოგეწონება, მხოლოდ ამის შემდეგ იწყება სერიოზული შრე ურთიერთობაში. სხვათა შორის, ქალის აქტიურობაც მისაღებია, შეიძლება პირველი ნაბიჯიც გადმოდგას, მაგრამ ზომიერება აქაც საჭიროა: თუ ქალი მამაკაცთან მივა, ქეჩოთი დაიჭერს და ეტყვის - ძალიან მომწონხარ და აბა, რას იტყვიო - იმ კაცის გულს ვერასოდეს მოიგებს. ასეთი ჰიპერაქტიური ქალი ნებისმიერ მამაკაცს დააფრთხობს. მე იმ აზრის მომხრე ვარ, რომ უშნო და ულამაზო ქალი არ არსებობს, უბრალოდ, არსებობენ ქალები, რომლებიც ვერ ახერხებენ თავიანთი მომხიბვლელობა წარმოაჩინონ. ამიტომ, ქალი ყოველთვის უნდა ცდილობდეს თავისი საუკეთესო თვისებები გამოავლინოს. ყველაზე ჭკვიან პოლიტიკოს ქალებს შორის კი დავასახელებდი მარგარეტ ტეთჩერს, ბენაზირ ბჰუტოს და ინდირა განდის. საქართველოში ძალიან საინტერესო პოლიტიკური ფიგურები არიან ნინო ბურჯანაძე, ეკა ბესელია და ელენე ხოშტარია. თითოეული მათგანი ძალიან ქალური და ამავე დროს, ჭკვიანია.

შოთიკო ნოზაძე, მსახიობი:

- როდესაც სილამაზეზე საუბრობენ, პირველ რიგში, მონიკა ბელუჩი და შარლიზ ტერონი მახსენდება. ოღონდ, ეს მშვენიერი ქალები მარტო გარეგნობით კი არა, სამსახიობო ოსტატობითაც გამოირჩევიან. ბავშვობაში ძალიან მიკვირდა, როცა ჩემი ტოლები რომელიღაც მსახიობს ან მომღერალს გააიდეალებდნენ და მერე მის პლაკატებს და სურათებს აგროვებდნენ. ასე `ჩაციკლული~ არავისზე ვყოფილვარ. ჩემი აზრით, გოგონებს უფრო ახასიათებთ მიბაძვა, თავს რომელიმე ცნობილ მსახიობს ადარებენ და იმისათვის, რომ მას დაემსგავსონ, პლასტიკურ ოპერაციებსაც იკეთებენ. ასეთები არ ფიქრობენ, რომ ანჯელინა ჯოლის ტუჩი, ცხვირი, ან რომელიმე ნაკვთი შეიძლება ყველას არ მოუხდეს. მე ბუნებრიობის მომხრე ვარ, მაკიაჟიც ზომიერი მომწონს. თანაც, მიმაჩნია, რომ ქალს მარტო გარეგნობა კი არა, ინტელექტიც უნდა ამკობდეს. საქმიანი და ინტელექტუალი ქალის იდეალი ჩემთვის ჰილარი კლინტონია, რომელსაც ბევრი სხვა ღირსებაც აქვს.

სოსო ცისკარიშვილი, ექსპერტი:

- როდესაც შუახნის ასაკს გადააბიჯებ, ადამიანებს სულ სხვა თვალით აფასებ. მე ბედის მადლობელი ვარ, რომ თავის დროზე სწორი არჩევანი გავაკეთე და ცხოვრების თანამგზავრად ის ადამიანი ავირჩიე, რომელიც დღემდე მხარში მიდგას. ჩემი მეუღლე ძალიან მაღალი სტანდარტების მქონე ქალია. ის ყოველთვის სანიმუშო იყო - პროფესიაშიც და ოჯახშიც, ამიტომ, ნებსით თუ უნებლიეთ, მეც სულ ფორმაში უნდა ვყოფილიყავი. ახლაც, როდესაც ვხედავ მის დამოკიდებულებას შვილებთან, შვილიშვილებთან და ოჯახთან, ვხვდები, რომ ცოლად იდეალური ქალი ავირჩიე. რა თქმა უნდა, საქართველოში ყოველთვის არსებობდნენ ქალბატონები, რომელთა მიმართ ენით აუწერელი პატივისცემა და მოკრძალება მქონდა, მათ შორის მედეა ჯაფარიძეს და ანა კალანდაძეს გამოვარჩევდი - როგორ შეიძლებოდა ასეთი ჭკვიანი და გამორჩეული ქალების მიმართ პატივისცემის გრძნობა არ მქონოდა? კიდევ არაერთი მანდილოსანი ვიცი, რომელიც მარტო თავისი გარეგნობით კი არა, ინტელექტითაც გამორჩეულია და ყველას ხიბლავს. შეიძლება ქალი არ იყოს თავისი გარეგნობით გამორჩეული, მაგრამ ბევრ მამაკაცს უყვარდეს, რადგან სილამაზის შეფასება ინდივიდუალურია. ძალიან ბევრი ჭკვიანი ქალი გვყავს, თანაც, მატრიარქატი გვიახლოვდება და უკვე დროა ჩვენი პრემიერ-მინისტრი, პარლამენტის თავმჯდომარე ან თბილისის მერი ქალბატონი იყოს.

რატი დურგლიშვილი, მომღერალი:

- ქართველებს ძალიან ბევრი ლამაზი მანდილოსანი გვყავს, თუმცა, მაკა ასათიანი არა მარტო საოცრად მომხიბლავი ქალია, ამავე დროს, ის ძალიან კარგი ადამიანია. მე მისი დიდი თაყვანისმცემელი ვარ. საქმიან ქალებს შორის ყოველთვის მომწონდა რუსუდან კერვალიშვილი - ისიც ძალიან დახვეწილი და გონიერი ქალბატონია. შეიძლება ქალს არ ჰქონდეს იდეალური ნაკვთები, მაგრამ ჩემთვის ლამაზი იყოს. შეიძლება უცბად ისეთი ადამიანი მოგეწონოს, რომ ვერც გაიგო, რატომ მოგეწონა. ეს იმიტომ ხდება, რომ შინაგან შარმს და ენერგეტიკას დიდი მნიშვნელობა აქვს. ალბათ ადამიანის მიმზიდველობაც უფრო შიგნიდან მოდის. ვიზუალურად ქალი როგორია, ამას დიდი მნიშვნელობა აქვს, მაგრამ ჩემთვის დოგმები ამ საკითხში არ არსებობს. ვერ ვიტყვი, რომ ქალი, რომელიც მომეწონება, აუცილებლად ქერა, ან შავგვრემანი უნდა იყოს, რა სიმაღლე უნდა ჰქონდეს ან რამდენი წიგნი უნდა ჰქონდეს წაკითხული. რაღაც სტანდარტები ამ საკითხში არა მაქვს და ყველას ინდივიდუალურად ვაფასებ. შეიძლება ქერა მომეწონოს ან წითელთმიანი, შეიძლება რამდენიმე ზედმეტი კილოგრამიც ჰქონდეს, მაგრამ უხდებოდეს. მოკლედ, გემოვნებაზე არ დაობენ, ვიღაცას ერთი მოსწონს, ვიღაცას - მეორე, რატომ? - ამის ახსნა აუცილებელი არც არის.

ბიძინა მახარაძე, იუმორისტი:

- იყო დრო, როცა ბრიჟიტ ბარდო იყო მოდაში და მეც ძალიან მომწონდა. საქართველოშიც ბევრი ლამაზი და ჭკვიანი ქალი ცხოვრობდა და ცხოვრობს, თუმცა როცა მკითხავენ - ვინ არის შენთვის ქალის იდეალიო, ყოველთვის ჩემი გამზრდელი ბებია მახსენდება - ჩადუნელის ქალი - ძალიან კეთილშობილი და კარგი ადამიანი, რომელსაც დედა ტერეზას ვამსგავსებდი. ცნობილი ქალების სილამაზეზე არაფერს ვიტყვი, რადგან შეიძლება ქუჩაში შემხვდეს გოგონა, რომელიც ყველა პოპულარულ და ცნობილ ქალზე უფრო მოხდენილი და ლამაზია. რაც შეეხება გონიერებას, გამოგიტყდებით, რომ მამაკაცური ჭკუის ქალები არ მომწონს, თუმცა პროფესიონალიზმს ყოველთვის დიდ პატივს ვცემ. საოცრად ნიჭიერი ქალი იყო მზია კვირიკაშვილი - ასეთი ნიჭიერი იუმორისტი ქალი მე არსად მინახავს.

გია ბუღაძე, მხატვარი:

- ულამაზეს ქართველ ქალებს შორის ყოველთვის გამორჩეულად მომწონდა ლია ელიავა. ის ძალიან დახვეწილი და მომხიბვლელი იყო. ყველაზე მეტად, ქალში რას ვაფასებ? - თვალებში ვარსკვლავებს და ლამაზ ღიმილს. ღიმილისთვის დაბადებულ გოგოებზე ვგიჟდები - რომ გაიცინებს და გგონია მზემ გამოანათაო... როდესაც ქალის ჭკუაზე ლაპარაკობენ, არ შემიძლია ჩემი მეუღლე არ ვახსენო: მე ასეთი გონიერი და ინტელექტუალი ქალი არ მინახავს - ამას ყოველგვარი დიპლომატიის გარეშე ვამბობ. საერთოდ მიყვარს ჭკვიან ქალებთან ურთიერთობა, რადგან მათგან ბევრ რამეს ვსწავლობ. ჩემი მეუღლე ამ მხრივ იდეალური ვარიანტია. რაც შეეხება ცნობილ, ისტორიულ პიროვნებებს, ჩემთვის ქალის იდეალი თამარ მეფეა. ასევე, ძალიან მესიმპათიურება ვახტანგ გორგასლის დედა - გურანდუხტი - სპარსი ქალი, რომელმაც ყველაფერი გააკეთა, თავისი ობოლი ბიჭი ღირსეულ მეფედ რომ აღეზარდა. ეს მართლაც საოცარი ქალი იყო, რომელსაც საქართველოში კარგად არ იცნობენ. საბედნიეროდ, ასეთი მანდილოსნები საქართველოში ყოველთვის იყვნენ და დღესაც არიან.

ხათუნა ჩიგოგიძე